| PÔETAWEBS | "Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto" 27 aprily 2021 |
||
 |
Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. Toetra Ràja
|
 |
|
 |
NAHOANA? Mpanoratra ARTHONY TOPAZE Loharano “Tontolo Isainana" Nanadihady Faniry Ezeckiel |
 |
| Lalana
diavin'ny olon-droa mifankatia ny fisarahana indrindra rehefa
misy ny tsy fifankahazoana. Io dingam-pisarahana eo amin'ny
fiainam-pitiavana io indrindra no resahin'i ARTHONY TOPAZE ao amin'ilay
tononkalony mitondra ny lohateny hoe "NAHOANA" izay notsongaina tao
amin'ny boky "TONTOLO ISAINANA". Asongadin'ity asa soratra iray ity ny
endrika isehoan'ny fisarahana eo amin'ny mpifankatia. Andeha
hirosoana lalindalina ny fanadihadiana ka hohazavaina mialoha fa
zavatra tsy manahoana firy dia mety hampifandao, raha efa izany, haseho
indray fa mampisaraka ny fiovam-panekena. *
* * Raha faritana fohy ny hoe fisarahana dia fihatahana na tsy fikambanana intsony amin'izay niombonana teo aloha, raha eo amin'ny olon-droa izy, midika ho fifandaozana sy faharavan'ny fiarahana hatrizay. |
NAHOANA? Nahoana ry tiana no niova fitempo Ilay fo niara-dia Tsy onja manafotra mety hahapempo F'eny am-paladia Ry tsiriry vorona misidintsidina tia setrasetra Mbola eto amorona dia miaka-midina Tsy mba mitoetra. Nahoana ry tiana ilay toky nomena no niova sahady Vao miana-manidina tsy mahazaka tena Fa mbola mandady Ny ravi-nihinana akory tsy maina dia hiova toetra Fitia vao mivelatra mbola maraina ka asiana fetra. ARTHONY TOPAZE (in Tontolo Isainana) |
|
Seho tsy manahoana firy dia mety hampisaraka. Olana madinika no mety hiitatra ka hampisara-bazana. Manaporofo izany ny fiandohan'ny sorakanton'i ARTHONY TOPAZE eto hoe: "Nahoana ry tiana
no niova fitempo
Ilay fo niara-dia Tsy onja manafotra mety hahapempo F'eny am-paladia" Rehefa ho avy ny fotoana hisarahana, tsy voasakana na voatohitra fa na zava-bitika monja aza miteraka fifandirana miafara amin'ny fisarahana. Araka izany, rehefa tsy mifandray ny tadin-dokanga, na tsy amin'ny antony aza, misara-dia. Tsy manam-paharetana amin'ny tiana ny tiavina. Manamafy izany ny tononkalo manao hoe: "Ry tsiriry vorona
misidintsidina
tia setrasetra Mbola eo amorona dia miaka-midina tsy mba mitoetra." Raha tsorina dia miovaova hevitra isan'andro, mbetika manaiky, mbetika mandà. Hafa ny ataony androany, hafa ny rahampitso, tsy manana fitiavana marindrano fa vao misy sedra kely dia mora mivadika. Tsy latsa-paka ny fitia mora malazo. Raha atao indray mitopy, rehefa mbola tsy eo ny fahamatorana ara-pitiavana dia mora mivaha ny fatoram-po. Haseho manaraka indray ary fa miteraka fisarahana ihany koa ny fiovam-panekena *
Minia mikimpy tamin'ny dina nifanaovana ny olon-droa. Hoy indrindra ny fanombohan'ny andininy faharoa ao amin'ny tononkalo: "Nahoana ry tiana
ilay toky nomena
no niova sahady Vao miana-manidina tsy mahazaka tena Fa mbola mandady." Vao fotoana vitsy monja no niarahana nisambatra tao anaty fitiavana dia niova fo ny andaniny. Nentanim-po mafana fotsiny ka nifanaiky hiara-dalana nefa tsy nahatanteraka ny toky nomena akory. Araka izany, tsy maharitra ny fitia aorina ambony voady an-tendro-molotra. Manao fihetsika mitory fankahalana ny olon-tiana. Manamafy izany ny famaranan'ny mpanoratra ny sanganasany: "Ny ravi-nihinana
akory tsy maina
Dia hiova toetra Fitia vao mivelatra mbola maraina Ka asiana fetra." Mbola tsaroana ho mamy ireo tandindon'ny niarahana hatrizay nefa nivadika tampoka ilay olo-malala. Ao anatin'ny fara tampon'ny hafaliana sy hasambarana vao nokoloina iny indrindra no teraka tsy ampoizina ny fisarahana. Tsy araka ilay niheverana azy tany am-boalohany ny fitodiky ny tantara. Fitaka ny afon'ampombo eo amin'ny olon-droa, mampiova saina an'ilay tiavina ny andro vitsy niombonana. *
* * Raha fehezina, mitondra fahadisoam-panantenana lalina ny faharavam-pitiavana. Ny tsy fahamatorana loatra no miteraka izany ka indraindray sakana kely tsy dia mankaiza no mampivadika tamin'ny ilay nifanekena ao anatin'ny andro vitsy. Hain'ny pôeta ery ny mandahatra ity aingampanahiny ity. Ny fipaikan'ny rima sy ny fonjan-kevitra dia mandresy lahatra avy hatrany. Moa tsy hamitrana indray ny fitiavana efa tapaka ny fipakan'izao kalo izao any am-pon'ny mpamaky? |
||
|
©
Pôetawebs
|
Date de dernière mise à jour : 26/04/2021
