Poetawebs - 15 taona
Felana
Radoniaina - 27/07/2024
Tohokalon'ny poeta, zara
traikefa ho an'ny faha-15 taonan'ny Poetawebs
Andro
manokana sy lehibe ho an'ny Poetawebs ny 26 jolay 2024, nankalazana ny
faha-15 taona niorenany ka nanatanterahany ny seho Tohokalon'ny poeta,
zara traikefa. Tomefy olona ny efitranon'i Dox tao amin'ny
tranombokim-pirenena izay natrehina manam-pahefana, mpandala ny
literatiora, mpampianatra, mpianatra, mpanao gazety isan-karazany...
Tsikimilamina Rakotomavo no tonian-danonana ka nanomboka izany tamin'ny
fanolorana ny ho fizotry ny fotoana ary nodimbiasan'ny tononkalon'i
Augustin Andriamananoro hoe "Ho anareo Poetawebs".
Nanamarika ny fotoana ireo lahateny teny am-piandohana,
nodimbiasan'ireo velakevitra samihafa. Noelanelanina antsa tononkalo sy
fanentanana ary indrindra ny fanamarihana ny faha-15 taona ireo rehetra
ireo.
Lahateny
Nanomboka ny lahateny ny
Prinsesy Fenosoa izay solotenan'ny taranaka poeta amin'ny maha
zafikelin'i Stella azy. Nandritra izany no nanasongadinany fa ny poeta
dia maneho ny ao am-po izay harindra amin'ny teny, maneho hafaliana sy
ny eritreritra rehetra. Nampahatsiahy ny mpanatrika ny Sekretera
Jeneraly mpisolo toeran'ny Ministeran'ny Kolontsaina sy ny Serasera fa
miara-miasa akaiky ny Poetawebs sy ny Ministera ary mifanohana hatrany
izy ireo. Nohazavain'Atoa Naivo Raholdina fa isan'ny ireo olona
mpandala ny literatiora ny tenany, namana akaikin'ny tranomboky ary te
hampivoatra ny tontolon'ny literatiora. Manana ny hasiny sy manana ny
lanjany ary tsiriritin'olona hoy izy izany hoe poeta izany ary rariny
loatra raha mahatratra ny faha-15 taonany ny Poetawebs.
Nizara roa ny velakevitra : tononkalo miaina sy tononkalo voakajy. Nisongadina tao anatin'ireo ny fizarana traikefa izay tena nahaliana ny mpanatrika.
Tononkalo
miaina
Rajaonarivony Toetra na Toetra Ràja no nanazava ny antom-pisian'ny
Poetawebs, ny tantarany sy ny tontolony. Izy no namorona ny Poetawebs
ka nanapariahana ny takelaka voalohany tamin'ny 30 avrily 2009. Manana
efitrano 5 ny Poetawebs: Tapatapakahitra, Fandalinana, Sehatra,
Lahatsoratra, Sorapiainana. Mahaliana fa voambolana nivoaka avy tao
amin'ny Poetawebs ny sorapiainana. Fantatrao ve fa ny Pr Narivelo Rajaonarimanana na Ny Malodohasaha (anarana maha poeta azy) izay anisan'ny Poetawebs no nitarika ny famokarana rakibolan'ny mpianatra sy ilay boky Loharano nipoiran'ny teny malagasy? Hita avy amin'izany fa milomano ao anatin'ny literatiora ny Poetawebs. Nanao jery todika ny dian'ny poezia malagasy i Ny Malodohasaha tao anatin'ny velakevitra "Ny Poezia malagasy sy ny aterineto". Izy no nanangana ny haisoratra.org. Nasongadiny ny fivelaran'ny poeta teo amin'ny tontolon'ny haino aman-jery sy ireo fomba isan-karazany hahafahan'ny mpanoratra mamoaka ny asasoratra. Fahombiazana ny fampiasana aterineto hoy izy satria sarotra ho an'ny poeta ny mamoaka boky ka amin'ny alalan'ny aterneto no ivelaran'ny asasorany.
Nanazava kosa i Nathalie Ramanambe, talen'ny fifandraisana amin'ny daholobe/ MSK, fa aseho amin'ny pejin'ny MSK isak'alahady tolakandro ny horonantsary fohy maneho ny poeta miantsa ny tononkalony. Amin'ny maha Tonony sy Kalo ny anaran'ity fandaharana ity dia miara-dalana ny fiantsana tononkalo sy ny fanehoana an-tsoratra ny tononkalo. Tanjona ny hitarika ny mpijery hianoka avy hatrany ny tononkalo ka sady mihaino izay ambara izy no manjohy avy hatrany izay voasoratra.
Nitondra fanazavana momba ny fandaharana" 'Ndao hamaky boky" ny Tompon'andraikitry ny fampiroboroboana ny rohim-boky BNM/MSK, Ravaoarimalala Henintsoa Patricia, fandaharana vokarin'ny tranombokim-pirenena ao amin'ny TVM indroa isam-bolana. Ny tanjona dia fitaizana sy fampahafantarana ny tontolon'ny boky sy ny vakiboky manerana ny Nosy. Ireo mpisehatra rehetra eo amin'ny tontolon'ny boky no asongadina mandritra izany. Fandaharana maro no efa tontosa indrindra ny mikasika ireo poeta sy ny tononkalo foroniny.
Tononkalo
voakajy
Nisantatra ny
Tononkalo voakajy ny fiarovana ny zon'ny mpamorona ao amin'ny aterineto
nentin'ny Talen'ny OMDA, Rarivojaona Velonirina. Nohazavainy aloha ny
zo ara-moraly ananan'ny mpamorona mifaningotra amin'ny tenany. Eo koa
ny zo ara-bola, azo avy amin'ny fampiasana ny sangan'asa izay ananany
zo na dia hatramin'ny 70 taona aorian'ny fahafatesany aza. Nanentana ny
poeta izy mba hiditra mpikambana ao amin'ny Omda. Nitodika tany Italia avy eo ny mason'ny mpijery nanaraka an'i Hery Serasera tamin'ilay velakevitra nataony izay nanazava ny antom-pisian'ny vetso.serasera.org dia ny fandraketana ny tononkalo anaty tranonkala. Azo atao koa ny miantsa tononkalo ka raketina ao anatin'io tranonkala io. Arahan'ny mpihainon'ny radio Vazo Gasy koa izy ireny, radio tafiditra ao anatin'ny vohikalan'ny serasera.org.
Nifantoka tamin'ny horonantsary virtoaly ny velakevitr'i Patrick Raveloarison. Nizara traikefa momba ny fanatontosana horonantsary fanadihadiana izy. Eo ihany koa ny fampielezana izany amin’ny tambajotran-tserasera samihafa (Youtube, Facebook, sns.) miampy ny fomba fitehirizana ireny tahirin-kevitra an-tsary ireny ho amin’ny toerana azo antoka sy maharitra.
Nosahanin'i Ny Hasina Ratsimbazafy (Poetawebs) ny fandravonana an'izany velakevitra 6 izany izay nofaranana tamin'ny dinidinika niarahana tamin'ny mpanatrika.
Nanaitra ny maro ny fivahiniana tampotampoky ny mpanakanto Aina Maharavo teny an-tsehatra izay sady mpanao hatsikana rahateo ka nampiaina ny hetsika noho ny fampihomehezana ny iray efitrano.
Marihina fa navohitra tamin'ny alalan'ny fanapahana mofomamy ny faha-15 taonan'ny Poetawebs teo afovoan'ny fotoana. Izany rehetra izany no ahafahana manambara fa seho miaina, velombelona, nanovozana fahalalana maro ilay Tohokalon'ny poeta, zara traikefa.
 |
| Prinsesy Fenosoa izay
solotenan'ny taranaka poeta |
 |
| Sekretera
Jeneraly mpisolo toeran'ny Ministeran'ny Kolontsaina sy ny Serasera |
 |
| Raholdina |
 |
| Raholdina, Prinsesy
Fenosoa, DDAF Maherizaka |
 |
| Patrick Raveloarison
(Poetawebs), Felana Radoniaina (Poetawebs),
Lila Hanitra Ratsifandrihamanana (taranaka poeta), Ny Hasina
(Poetawebs), Soeur Isabelle (Librairie Md Paoly), Pr Narivelo
Rajaonarimanana (Poetawebs) |
 |
| Pr Narivelo Rajaonarimanana "Ny Poezia malagasy sy ny aterineto" |
 |
| Patrick
Raveloarison "Horonan-tsary virtoaly : famoronana,
fanapariahana, fiarovana" |
 |
| Ny poeta Lavenona, niantsa
tononkalo |
 |
| Valiha Gasy (Faribolana
Sandratra), niantsa tononkalo |
 |
| initra mialoha ny
fanapahana ny mofomamy, manazava ny lamina ny tonian-danonana |
 |
| Miara-manapaka ny mofomamy
ny
Poetawebs. Miankavanana : Ny Hasina Ratsimbazafy, Ny Malodohasaha,
Tsikimilamina Rakotomavo, Rita, Felana Radoniaina, Patrick Raveloarison |
|
| Poetawebs niaraka
tamin'ireo poetan'ny Faribolana Sandratra |
 |
| Poetawebs niaraka
tamin'ireo mpianatra oniversite (LLOM/CIRAM) |
 |
| Ireo nisahana ny
fandraisana olona (LLOM/CIRAM) |
 |
| Ireo mpanatrika, indray
mitopy maso |
Date de dernière mise à jour : 28/07/2024