Valiha Gasy mandalina an'i Randja Zanamihoatra
Ny asasoratra nifotorany
Valiha
Gasy - 07/06/2025
Ity fanadihadiana
ity dia nosintonina tamin'ny tapatapakahitra nifanaovan'i Valiha Gasy
tamin'i Toetra Ràja (Poetawebs) ny 19 mey 2025 (daty nipariahana) ary
tsy naseho tao anatin'izany tafatafa izany toa ireo andiany 4 hafa tao
anatiny.
Nanoratra
izay rehetra nandalo tao an-tsainy i Randja Zanamihoatra raha ny
fisavovon'ny takelaka manidiny no tsikeraina ary nandranto fahalalana
tamina loharano lalina sy nivelatra raha ireo forongom-boky voalazan'ny
zanany fa nananany, miampy ireo tahirin-kevitra maromaro mbola tazana
any ihany.Misy any mantsy teny irery tonga tsangan-keviny manokana ka anisan'izany ny famoronana ohabolana izay nitondrany ny solon'anarana hoe " REV PERE RANDJA ZANAMIHOATRA" (oh: "Ny adala no hendry indrindra satria tsy manely, tsy mizara fahendrena"). Voasorany any koa ny "Feon'ny fantatra sy ny tsy fantatra" araka ny filazany ka amin'izany ny taratasy sasany niresahany tamin'Andriamanitra sy niresahany tamin'ny tenany, "... any Randja". Any koa ireo karazana episitily toa taratasy tsy nalefa... na tsy tonga toy ny hoe "Efa niteny Andriamanitra"; nararaky ny peniny hatramin'ireo nofy moana saiky tsy hotantaraina, "Ny diako tany an-danitra". Ary soa fa mbola voatahiry ireo taratasy sasany nifandefasany tamina mpanoratra indray nihira taminy sy tamina mpiandraikitra an-gazety toy ny nalefa tamin'i Clarisse Ratsifandrihamanana, ny nalefa tamin'ny mpiandraikitra ny gazety Fandrosoam-baovao... sy ireo taratasy nifehezany ny teny amin'ny maha fitsipika azy kanefa koa nofolahiny hahay hifamatotra amin'ny maha fanaovan-javakanto azy. Ohatra amin'izany ny "Essai de dictionnaire des Rimes selon Edmond Randriamananjara". Ireny sisa ahatarafana mivantana ny niainany sy ny zava-misy hita sy tsapany tsy hilana fandalinana be.
Amin'ny ankapobeny, tombanako ho ny dimy isan-jaton'ireo zavatra nosoratany ireny niseho masoandro ireny, izany hoe navoakany boky ara-dalàna na... tsy misy afa-tsy amboaran-tononkalo "VAINAFO TONONKIRA" izay, saingy na io boky io aza amin'izao fotoana izao efa zara raha hita. Anankiray no ao amin'ny tranombokim-pirenena sisa ahitako azy. Ny marina anefa dia mpandala iringiriny, mpilalao teo amboniny sady ngezalahy nandrafitra ny kianjan'ny literatiora malagasy Randja Zanamihoatra satria misy any sombintantara toy ny "Ilay Rapaoro miafina"; any koa ny piesy teatraly mitantara ny nahaterahan'i Kristy, nataony tamin'ny fombany. Mihiboka any koa ny tantara foronina ("Alina farany") efa an-jato pejy maro. Tombanana ho avo telo henin'ny isan'ireo tononkalo aman-dahatsoratra maneho toe-po toy ny piraozy poetika ("Mena masoandro" - 1960 ohatra) ny isan'ireo piraozy tsotra aman-dahatsoratra mamotopoto-kevitra, miampy ireo famakafakana nataony ka amin'ireo ihany ny mbola nifaly havanja teo ambalan'ny literatiora toy ny namahavahany ny tantara foronin'i E.D. Andriamalala "Antso" sy "Taolombalo".
Valiha
Gasy
Ny asasoratra nifotorany
