 |
PÔETAWEBS | ||
| Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.
Ràja
|
 |
"Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto". 13
Marsa 2021
|
|
| TENINDRAZANA.TANINDRAZANA
! |
| Ny Tany – Tanindrazana –
Tenindrazana. Singa ara-boajanahary nataon’Andriamanitra tsy ho
afa-misaraka ireo ka ahazoana mamaritra sy manoritra ny firenena iray
omban’ny fomba amam-panaony. Ny zara faritany, na toa inona, na toa inona tokoa manko habeny na hakeliny, dia toy ny vala mamaritra ara-boajanahary ny foko na firenena iray izany. Voafono tanatin’izany ny fomba amam-panaony, izay iavahany amin’ny foko na firenena hafa. Tsy fanahiniana fa notefen’ny zava-misy araka ny namponenan’Andriamanitra ny olombelona ho isam-poko na isam-pirenena. Ankoatra ireo, izay tsy kely fa anisan’ny lehibe indrindra, tamin’izay nahariana ny olombelona, ny nanomezan’Andriamanitra azy "lela", ahazoan’ny olona mamoaka sy mamolaka ny "teniny" sy ny "fiteniny" araka ny "Tany", izay tanindrazana nametrahan’Andriamanitra azy, ka teraka avy ao ny "Tenindrazany". Vala iray lehibe tsy azo tsinontsinoavina izay ihavahan’ny mponina eran’izao tontolo izao mihitsy izany karazam-piteny isam-pirenena na isam-poko izany. |
 |
|
Miitatra lavitra anefa,
rehefa halalinina ny zava-miafina sy ny fifaningoran’ireo singa maro
amin’ny fiainan’ny olona iray, na foko iray, na firenena iray, izay
mifamatotra ho azy amin’ny fomba fiteniny. Tsy manavaka azy ho araka ny
karazam-poko na firenena niaviany ihany fa itarafana ny maha izy azy
ilay miteny ilay fiteny mihitsy. Ny toe-pony, ny toe-tsainy, ny fomba
amam-panaony sy ny sisa.  Mahavariana ohatra ny mahita olombelona
tera-tany tamin’ny firenena iray, voatery mandao ny tany niaviany ka
nony injay rehefa nonina sy nilona tamin’io firenena hivahinianany io
izy, ka efa niha nahazo faka tanteraka tao aminy ny fitenin’io firenena
io, dia lasa nanova ho azy ny fomba amam-panaony, eny hatramin’ny fomba
amam-pisainany izany.Misy koa anefa ireo izay minia mihazona mafy ny tenin-drazany na dia mivahiny amin’ny tany hafa aza, ka tsapa ho voatahiry ihany, ilay rafi-tsaina voajanahary, voatefin’ny tenindrazany ao aminy. Hita taratra amin’izany fa manana hery miafina hanefy ny isam-batan’olona ny fomba fiteny iainany isan’andro. Fa ny mampanahy sy mampatahotra indrindra dia izao: arakaraka ny hitsoahan’ny tenindrazana tsikelikely eo ambavan’ny olona isam-pirenena dia miendaka tsikelikely manaraka izay ihany koa izay ifamatoran’io olona io amin’ny fomba amam-panaony sy ny fomba amam-pisainany tao amin’io faritra niandohan’ny razambeny io. Tsy hanana fototra hifaharana sy handrefesany ny maha izy azy intsony izy satria lasa vahiny amin’ny Tenindrazany. Mifamatotra tanteraka amin’ny fankamamian’ny olona ny Tanindrazany tokoa manko, ny fandalàny ny Tenindrazany! Ny Mamatonalina
|
||
 |
 |
|
©
Pôetawebs
|
Date de dernière mise à jour : 13/06/2021