| PÔETAWEBS | "Tsy azo adika na alain-tahaka raha tsy mahazo
lalana avy amin'ny Pôetawebs fa voararan'ny lalàna 94-036 ny 18
septambra 1995 mikasika ny zon'ny mpamorona sy ny mpanakanto" 26 nôvambra 2019 |
||
 |
Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. Toetra Ràja
|
 |
|
 |
Tsy vahiny amin'ny mpiseran'ny Pôetawebs intsony ny pôeta Imbitika Rambala satria vao tamin'ny herintaona toy izao izy no nivahiny teto amin'ity efitra Tapatapakahitra ity ka nanambarany ny "Eri-maso 1", bokin-tononkalo sy tantara navoakany. Efa vonona indray ny bokiny manaraka izay harahina hetsika ho fanamarihana izany amin'ny zoma 29 nôvambra izao. Nahasarika ny tranonkalanao ny hafainganam-pandehany. | |
|
Toetra Ràja
Miarahaba anao Imbitika Rambala. Tamin'ny ôktôbra 2018
nivoahan'ny
"Eri-maso 1" ve dia efa noeritreretinao hoe herintaona monja aty
aoriana ny laharana faharoa?
Imbitika Rambala
Miarahaba anao ry namana Toetra Ràja. Marina tokoa fa
hamoaka boky vaovao indray aho dia ny Eri-maso 2.
Ary izany dia noho ny fampirisihana sy fankaherezana avy tamin'ny Dokotera Tsikimilamina Rakotomavo, izay anehoako fisaorana mitafotafo noho ny fanomezana tolo-tanana mavesatra ho an'izany. Herintaona tokoa izay no nivoaka ny Eri-maso 1 dia inty indray ny Eri-maso 2. Zavatra roa angamba no tiako hitondrana fanazavana. 1) - Amin'ny maha ERI-MASO azy, izany hoe eritreritra
vokatr'izay
hitan'ny maso hatramin'ny nahatsiarovan-tena, dia mazava ho azy fa toy
ny olona rehetra dia maro tsy tambo isaina ny tokony holazaina sy
horaiketina an-tsoratra saingy indrisy tsy fahafiriny akory no
voarakitra, koa izay misy ato no halamina sy havoaka tsikelikely.
2) - Mpiasam-panjakana kely misotro ronono izahay mivady -
ny
zanakay no mandray ny andraikitra famoahana ireo boky ireo - saingy
mbola tsy izahay mivady mihitsy ange no tokony ho adidin'ny zanakay e!
Mbola ao ireo zanak'izy ireo, indrindra mbola tsy maintsy hampanjary ny
nofinofy sy hanomana ny hoaviny izy ireo. Azonao angamba ny tiako
holazaina!
Toetra Ràja Mazava tokoa! Tsy hitarazoka angamba izany ny laharana
fahatelo?
Imbitika Rambala
Hamoaka ny laharana fahatelo indray ve hoy ianao manontany?
Faniriako io, fikasan'ireo zanako, nefa koa fandaharan'Andriamanitra
izany.
|
||
| Toetra Ràja
Misy mpanampy ve ianao
amin'io hetsika famoahana ny boky io : ara-pitaovana sy amin'ny antsa
tononkalo?
Imbitika Rambala I Brentch Mbolamasoandro sy i
Liantsoa no hiantsa ny tononkalo. Tsy naka mpanakanto hafa aho fa ny
vitsivitsy amin'ireo hira mba noforoniko no entina handravahana ny
lanonana.
Ireo zanaka aman-jafinay no miaraka misalahy manomana an'io hetsika io. Toetra Ràja Ahoana indray àry ny endriky ny boky? Imbitika Rambala
Tsy miova ny firafitry ny
boky, dia tononkalo arahina tantara feno ary faranan'ny tantara mitohy
ka raha toa ka mbola tsy nisy nanao ny toy io firafitra io, dia izay no
mampiavaka azy.
Ny Dokotera Tsikimilamina Rakotomavo no nanao ny teny fanolorana. Ny anton'ny safidy dia noho ny fahafehezany ny lahatsoratra malagasy. |
|
|
Toetra Ràja
"Faranan'ny tantara mitohy",
hoy ianao, tsy karazana fisarihana ny mpamaky hanjohy akaiky ny
laharana manaraka ve izany?
Imbitika Rambala Marina fa tena fisarihana ny
olona io laharana io kanefa tsy noho ilay tantara "mitohy" loatra fa
haka tahaka ny zavatra hita ao amin'ny Facebook izay mahasarika ny
ankabeazan'ny olona amin'izao fotoana izao.
Toetra Ràja
Mihevitra ny hamoaka
"Eri-maso" laharana firy moa i Imbitika Rambala?
Imbitika Rambala Dia tena tsy haiko izay
hiafaran'ny laharan'ny "Eri-maso" satria na efa tsy eny intsony aza aho
dia mbola hanana "Eri-maso" hatonta foana ny taranako.
Toetra Ràja
Karazana mpijery tahaka ny
ahoana moa no andrasan'i Imbitika Rambala amin'io hetsika io?
Imbitika Rambala
Izay liana amin'ny
foto-kevitra hoe NAHOANA NO MANORATRA?
 Toetra Ràja ... sy ny hoe "nahoana no
asandratra ny soratra?" Misaotra anao Imbitika Rambala nanazava taminay
an'izao vaovao mahafaly izao ary mirary fahombiazana ho an'ny boky sy
ny hetsika.
Imbitika Rambala
Misaotra indrindra namana
Toetra Ràja! Manantena ny fanotronanao an'io hetsika io, amin'ny zoma
29 nôvambra amin'ny 10 ora maraina ao amin'ny Immeuble ex SOMACODIS
Analakely. Mirary anao hahavita be eo amin'ny fampiroboroboana ny teny
malagasy.
Mankasitraka tompoko! |
Nandrintra ny takelaka : Toetra Ràja
|
poetawebs@gmail.com
|