Tsenaben'ny boky 2025

Tokotanin'ny Tranombokim-pirenena ao Anosy

Toetra Ràja - 02/06/2025

Hotanterahina amin'ity herinandro ity ny Tsenaben'ny boky fanao isan-taona ka ao amin'ny tokotanin'ny Tranombokim-pirenena ao Anosy no hanaovana izany ny 04 - 05 - 06 jona 2025.

Hanamarika ny toerana ireo trano heva maro fampirantiana boky sy ny tontolony. Hampiavaka ity hetsika ity koa ny fanentanana amin'ny alalan'ny velakevitra, rohin'ny boky manomboka amin'ny famoronan'ny mpanoratra azy mandra-pahatongany ho eny am-pelatanan'ny mpamaky, fitantarana angano, fotoana ho an'ny teatra frankôfôna, fanolorana boky vaovao...

Eo amin'ny tontolon'ny poezia dia singanina manokana ny velakevitra hotontosain'i Ranoe amin'ny hoe "Inona no antsoina hoe: mpanoratra sy poeta?"

Tsy ho diso anjara amin'ny fampirantiana ireo bokin'ny poeta sy mpanoratra ka anisany ny ao amin'ny trano hevan'ny Poetawebs izay hanolorana ireo andiana boky sorapiainana poeta. Ao anatin'izany no hahafahan'ireo mpitsidika mifanakalo hevitra amin'ireo mpikamban'ny tranonkala.