| PÔETAWEBS | "Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto" 27 aogositra 2019 |
||
 |
Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.Ràja |
 |
|
 |
Pôeta adala Mpanoratra : Ngaly Loharano : Ambioka, novambra 2001 Nanadihady : Tsikimilamina Rakotomavo |
 |
| Ngaly |
Tsikimilamina Rakotomavo |
| Tsy
tena fantatry ny ankamaroan'ny olona ankehitriny ny fiaimpiainan'ny
pôeta. Hany ka miparitaka etsy sy eroa ny filazana azy ireny ho adala.
Miresaka izany indrindra i Ngaly ao amin'ny tononkalony izay
nampitondrainy ny lohateny hoe "pôeta adala" ary nalaina tao amin'ny
gazety Ambioka ny novambra 2001. Niharihary tamin'izany fa manana ny
maha izy azy eo anivon'ny haisoratra malagasy ny pôeta. Hamahavahana
izany akaiky dia hodinihina mialoha ny famaritan'ny olona ny atao hoe
pôeta. Hobanjinina aorian'izany ny andraikiny. Ezahina hadihadiana
mifanesy etsy ambany ireo fizarana roa ireo. Dieny ety am-piandohana dia andeha avohitra ireo famaritana samihafa ataon'ny olona amin'ny pôeta. Voalohany indrindra dia hita fa manaratsy azy ireo ny mpiara-belona. Toa manambany sy manendrikendrika azy ireo ho tsy ampy saina mantsy ny sokajin'olona samihafa. Hoy indrindra ny andalana 1-4 : "tsy nisalasala
Naneso ilay mpitsara Nilaza fa adala hono Ireo pôeta!" Manaraka izany dia fantatra fa noho ny hakelezan-tsain'ireo manodidina no mahatonga azy hanaraby ny pôeta. Toa tsy ampy fiheverana loatra mikasika ny pôeta mantsy izy ireo hany ka miteniteny foana amin'ny alalan'ny fanaratsiana isan-karazany. Hamafisin'ny tononkalo izany manao hoe: "tsy takatry ny sainy". Ankoatra izay voambara dia tsapa fa ny tsy fahafantaran'ny hafa na ny manodidina ny momba ny pôeta no mitarika ny fanaovana tsinontsinona azy ireny. Toa tsy hain'izy ireo angamba fa marani-tsaina ny pôeta izay heveriny fa mirediredy. Ka hoy indrindra ny lahatsoratra: "Kanefa
raha mba fantany
ny lalina efa takany!" |
PÔETA ADALA Tsy nisalasala Naneso ilay mpitsara Nilaza fa adala, hono Ireo pôeta ! Kanefa raha mba fantany Ny lalina efa takany!… Dia angamba tsy nesoiny Hoe: izao sy izao ireny Tsy takatry ny sainy Fa ny pôeta monja Dia ampy hampanonja Ny marindrano maty Tsy tao an'eritreriny Fa ny pôeta ihany Dia ampy hampitomany Ny fo mamatovato Angamba koa tsy tsapany Fa ny pôeta indrindra No hery mampirindra Ny fiainany mihotaka Indrisy tsy mba fantany Fa ny pôeta mihitsy No vavahadin-tsiky Mpanazava ny aliny Ilay pôeta "adala"! Kanefa hasambarany! NGALY Ambioka, novambra 2001 |
|
Maro tsy tambo isaina
araka izany ireo famaritana ny pôeta ho toy ny tsy ampy fiheverana
kanefa fijery ivelany ihany ireny.
Raha nojerena teo àry ny famaritan'ny olona ny atao hoe pôeta, andeha kosa hasongadina fa manana andraikitra izy ireny. Anisan'ny sokajin'olona manana andraikitra goavana eo amin'ny tontolo manodidina azy ny pôeta. Voalohany indrindra amin'izany ny fahaizany manova zavatra. Hain'ny pôeta ny maneho amin'ny fomba kanto izay toe-javatra tsy hain'ny saina aman'eritreritra takarina eo amin'ny fiainana. Hoy i Ngaly milaza izany : "tsy takatry ny
sainy
Fa ny pôeta monja Dia ampy hampanonja Ny marindrano maty" Manaraka izany dia hita fa
manome fifaliana ny pôeta. Hainy ny
mampihetsi-po ny hafa mba hisian'ny filaminana eo aminy. Havanana eo
amin'ny fampialana voly sy sorisorin-tsaina izy noho izany.
Hamafisin'ny tononkalo izany manao hoe :
"fa ny pôeta
indrindra
no hery mampirindra ny fiainany mihotaka" Ary ny tena andraikitra
goavana sahanin'ny pôeta dia ny
fitarihan-dalana ataony amin'ireo manodidina azy. Asa sarobidy sy tsy
manam-paharoa no iantsorohan'ny pôeta ary miezaka ny hisarika ny
mpiara-belona aminy hatrany izy mba tsy hibirioka eo amin'ny fiainana.
Hoy ny andalana 22-24 :
"fa
ny pôeta mihitsy
No vavahadin-tsiky Mpanazava ny aliny" Ireo rehetra ireo no
ahatsapana fa manana ny maha izy azy ny pôeta.
Raha aravona izay voalaza rehetra teo dia hita tokoa fa manana ny maha izy azy eo anivon'ny haisoratra malagasy ny pôeta. Tsikaritra tamin'izany fa maro ireo famaritana ataon'ny olona mikasika ny pôeta toy ny fanambaniana atao aminy. Eo anatrehan'izany dia manana andraikitra lehibe izy. Anisan'ireny ny fitarihan-dalana ataony. Raha ny tononkalon'i Ngaly no asian-teny dia hita tokoa fa kanto noho ny fampiasany tamberinteny amin'ny toerana tsy voafetra : "pôeta". Manasongadina hatrany ny pôeta amin'ny tontolo misy azy izany. |
Nandrintra ny takelaka : Toetra Ràja
|
poetawebs@gmail.com
|
Date de dernière mise à jour : 23/08/2019