OTY VONINKAZON'I LOLO RAJOHNS

Sarotiny amin'ny fandalana ny tenin-drazany i Lolo Rajohns, ilay poeta sady mpitsikera literera no mpamaky lay teo amin'ny fomba fanoratana tononkalo. Na mpakafy poeta vahiny samihafa fiaviana aza izy dia nifikitra sy nanasoa ny teniny. Taratra amin'ny asasorany izany ka anisany ity "Ny fiteny malagasy" ity, nosoratany tamin'ny 1972, nalaina tao amin'ny bokiny "Ny aingam-panahy vaovao, Ny rindran-kira ho anao", tak 53. Heveriny fa tokony ho vao mainka mampiroborobo ny fitiavana ny teniny ny fampiasana ny teny vahiny. Hofaritana aloha fa mampitombo hatsarana ny teniny ny fahaizana ny an’ny hafa, mialoha ny hanasongadinana fa mampitombo aina ny an’ny tena izany.

Teny vahiny : mampitombo hatsarana ny an'ny tena

Oharin'i Lolo Rajohns amin'ny voninkazo ny teny. Anisan'ireo mpioty izany any amin'ny tanin'ny hafa firenena izy, araka ny voalazany hoe "Koa raha mioty ny voninkazon'ny tany hafa izahay". Izany fankafizana ny an'ny hafa izany, miseho amin'ny alalan'ny fiotazana, no vao mainka mampitombo ny fandalana ny an'ny tena: "Moa tsy vao mainka mampitombo hatsarana". Izay mety ho fanalavirana no vao mainka mampirongatra ny herin'ny fahasarotam-piaro hiverina sy hifikitra amin'ny an'ny tena: "Ry fiteny saro-piaro". Toa vao mainka mantsy mampitombo fatra ny hetahetan'ny hakantony, ny hamaminy ary ny hanitry ny voninkazon'ny tena mandritra ny fotoana somary mahalavi-maso azy. Ho tsapa tokoa, araka izany, fa ireny mamy sy mamerovero any an-kafa ireny dia miseho amin'ny endrika miavaka ao anatin'ny voninkazon'ny tena ka mampite-hamelona aina.

Teny vahiny : mampitombo aina ny an'ny tena

__________________________
"NY FITENY MALAGASY
 
Koa raha mioty ny voninkazon'ny tany hafa izahay
 Moa tsy vao mainka mampitombo hatsarana
 Sy mampitombo aina anao indray?
 Ry fitenin-drazako
 Ry fiteny saro-piaro"

Lolo Rajohns,
In Ny aingam-panahy vaovao, Ny rindran-kira ho anao, 1972, tak 53