Tsy kivy anie aho!
TSY KIVY ANIE AHO !
Poeta nobeazina tao anatin'ny
fifaliana hatrany i Samuël Randria
ka tsy mahagaga raha mirona bebe kokoa amin'izany ny tononkalony.
Anisany ity "Tsy kivy anie aho!" ity, nalaina tao amin'ny Gramera
malagasy t.19 (1958), andininy voalohany. Mahalasa fisainana indrindra
ao amin'io andininy io ny herin'ny hafaliana manoloana ny mety ho
fahalemen'ny olombelona. Hozohina akaiky aloha ny tokony hitrakana
manoloana ny kilema. Raha efa izany dia hasongadina ny hafaliana tokony
haterany.
Tsy ketraka aho
Mitondra ny oroko petaka;
Ifalifaliako
Sy tena tiako
Ny molotro iray mivareraka."
*
* *
Ny tokony
hitrakana manoloana ny kilema
Noho izany indrindra no andraisan'i Samuël Randria adidy hampiabo ny sain'ireo tompon-kilema satria tandindonin-doza izy ireo noho ny hetraketraky ny manodidina. Halaky ho kivy sy ho ketraka izy ireo raha tsy mitraka, izany hoe higedragedra ka hiitatra hatraty amin'ny rantsam-batana ny fahaketrahana rehefa ho tohin'ny fahasimban-tsaina.
Fananarana sy fanentanana hialana amin'ny fahakiviana no avohitry ny mpanoratra. Sady mampahery izy no maniry ny hitoeran'izany faherezana izany amin'ny alalan'ny mpamaritra matoanteny "anie". Faniriana sy firarian-tsoa rahateo izany ka misarika ny ketraka mba hiarina sy hioitra.
Ny
hafaliana tokony haterany
Tsy vitan'ny sakanana tsy ho kivy sy tsy ho ketraka ny tompon-kilema fa mbola sarihina handray am-pifaliana ny toe-batana ara-boajanahary nomena azy. Ahoana tokoa moa no ahafahan'i Samuël Randria mandresy lahatra ny kilemaina ho falifaly amin'izany? Karazana kilema faran-tampony ity "molotra iray mivareraka" noraisin'ny mpanoratra ho azy ity. Sarotra inoana ny fisian'ny olona mitondra izany. Miborotsaka sy mirefarefa mantsy ny hevitry ny mivareraka. Ny molotra ambany no voakasik'izany satria raha ny ambony dia mbola misy molotra iray manohana ihany. Manimba endrika indrindra izany satria misonaka eny foana ny vava. Ny toy izany anefa no nahariana ilay olona sy maha izy azy ary ifalian'i Samuël Randria. Na ny kilema mavesatra toy izany aza ifalian'ny mpanoratra, koa mainka fa ho ireo kilema azo leferina? Miantefa any amin'ireo tompon-kilema rehetra ity hafatra ity.
Ankoatra ny kilema ara-batana,
mety ho tsy voaresaka firy ny kilema ara-toe-tsaina izay mivoaka eo
imolotra indraindray. Io ihany koa ilay molotra mivareraka, organa
mpaneho ampahibemaso izay aloaky ny fo maloto tsy fampiseho masoandro.
* *
Fisarihana ny mpiara-belona aminy hiabo eo amin'ny fiainana no
anisan'ny antom-pamoronan'i Samuël Randria tononkira sy tononkalo.
Mitaona ny fiarahamonina hifaly amin'ny tolo-batana nomena azy izy ka
hampiasa izany hahatonga olom-banona. Na dia tsy petaka orona sy tsy
mivareraka molotra aza i Samuël Randria, satria lehilahy tomady,
mijoro, itoeran'ny tanjaka noho izy mpilomano ikoizana, dia mety ho
nanana ny kilemany ihany saingy nifalifaliany tamin'ny fiainany ka
nahatonga azy ho olom-banona ary mpitarika voalohany ny skoto teto
Madagasikara.
Date de dernière mise à jour : 17/07/2024