 |
PÔETAWEBS | ||
| Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.
Ràja
|
 |
"Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto". 04 Aprily 2022
|
|
| Vetson'ny
Fanahy |
| Handray pôeta andrarezina indray ny
Tranombokim-pirenena Anosy. Ny Mpizaka STeLaRiM, fikambanana havanana
amin'ny fiketrehana hetsika mahaliana no hanatanteraka azy ary tsy
vahiny intsony eto amin'ny tranonkala Pôetawebs. Mitapatapakahitra
amin'ny tranonkala ny solontenany, Fifi Razakarison, manazava izay
miandry antsika amin'ny hetsika VONIN-TENINA. |
 Faly mandray anao izahay ato amin'ny tranonkala Pôetawebs Fifi Razakarison Faly mivahiny eto amin'ny Pôetawebs ihany koa ny tenako. Vetson'ny Fanahy Mino izahay fa manana vaovao ianao matoa mivahiny eto amin'ny tranonkala. Inona izay vaovao izay raha tsy mahadiso? Fifi Razakarison Eny, manana vaovao tokoa aho. Amin'ny maha mpikambana ahy ao amin'ny Mpizaka STeLaRiM no isoloako tena eto, izay ao anatin'ny fanomanana ny hetsika vonin-tenina tanteraka izao. Io no vaovao akaiky indrindra. Vetson'ny Fanahy Vonin-tenina, azonao velabelarina amin'ny mpanaraka ve ity hetsika karakarainareo ity? Fifi Razakarison Antsan-tononkalo hamelona ny asa soratr'ireo pôeta manana ny lazany eo amin'ny literatiora malagasy. Izany hoe, mitondra ny anjara birikinay izahay ho fielezan'ny kanto ao anatin'ny asa soratr'izy ireo. Voaravaka hira ihany koa izany eny anelanelan'ny antsa, ary izahay ihany no mihira. Vetson'ny Fanahy Inona no vala namaritanareo hoe "ity malaza, dia itsy tsy malaza"? Ny namaritanay azy dia araka izay efa nisy nikaroka. Tsy nifidy izahay hoe betsaka sa vitsy. Fa izay nisy nikaroka teny amin'ny anjerimanontolo no nosokajinay ho malaza. Vetson'ny Fanahy Nofaritanareo ho Asa soratra mpanoratra efa nindaosin'ny fahafatesana ve ireo tononkalo ho velominareo? Fifi Razakarison Mpanoratra efa teo aloha ka maty ary nahavitana fikarohana ny asa no tafiditra tao anaty masontsivana napetrakay. Vetson'ny Fanahy Raha mijery isika, misy mpanoratra mbola velona, efa misy manao fikarohana ny asany. Ho anareo ve misy antony manokana no nametrahana an'ilay hoe mpanoratra efa maty ? Sa ve hoe tsy malaza izy raha mbola velona na dia efa nahavitana fikarohana aza? Fifi Razakarison Ny efa maty dia efa nitsahatra tamin'ny fanoratany izy noho izany fantatra ny asa sorany teo am-piangana hatramin'ny farany. Ny mbola velona tsy voafaritra iny. Araka izany ireo no asa soratra navelany ho an'ny mpankafy sy ny mpikaroka. Vetson'ny Fanahy Mazava tsara, mpanoratra firy eo no tafiditra tao anaty mason-tsivanareo? Fifi Razakarison Eo amin'ny 10 eo ho eo, anisan'ireny i Elie Rajaonarison, Le Myosotis, Samuel Ratany, Jean-Joseph Rabearivelo... Vetson'ny Fanahy Hiverenantsika amin'izay ny anaran'ilay hetsika. Azonao hazavaina ve ny dikany? Inona ny Antony hoe io no safidinareo? Fifi Razakarison Ilay lohateny dia nalaina tamin'ny ohabolana hoe: "TSINTSINA MITONDRA VONIN-TENINA KA IZAY ERAN'NY VAVA NO ENTINA". Izany hoe, naka ampahampahany tamin'ireo asa soratra heverina ho sangany tamin'ireo mpanoratra zokiny izahay ho fanehoana fa misy ainga izay voatahiry sy kanto miafitra ao anatin'izy ireny. Ankoatra izay, tokony ho tamin'ny iray volan'ny pôezia izy ity no natao nefa noho ny lamina eo amin'ny efitrano dia tsy tanteraka izany. Anjara biriky avy aty aminay entina hankalazana ny iray volan'ny poezia izany io. Ary tsy hihambo ho hahavita be akory fa izay kely avy aty aminay no hasehonay sy hampahafantarinay. Vetson'ny Fanahy Miresaka toerana ihany ianao, aiza tokoa moa izy ity no atao, ary rahoviana?  Ao amin'ny Tranombokim-pirenena Anosy efitrano Dox no hotanterahina ny hetsika ny 6 aprily 2022 ho avy izao. Alarobia io, tsy misy vidim-pidirana fa mandray izay foy kosa ho fanohanana ny literatiora. Vetson'ny Fanahy Nisy safidy manokana ve ilay toerana? Fifi Razakarison Ilay toerana tsy nasiana safidy fa fiarahana miasa teo aminay sy ny Tranombokim-pirenena. Izany hoe natao tao satria tao no nandray ny fangatahana natao. Vetson'ny Fanahy Mazava ny amin'iny, ary ny amin'ny tsy fisian'ny sandam-pidirana? Fifi Razakarison Tsy misy sandam-pidirana satria mila fahazoan-dalana avy amin'ny Omda sy ny fianakavian'ny mpanoratra vao mety izany. Noho izany, tsy nasaina sandany ny fijerena sy fianohana ny asa soratr'ireo. Vetson'ny Fanahy Mazava koa ny amin'iny. Hetsika efa fanaonareo ve ny toa ity sa vao sambany mihitsy? Fifi Razakarison Vao sambany ny hamelona ny aingan'ireo pôeta zokiny izahay. Ny manao hetsika kosa efa fanao ihany fa mitady izay fomba tsy hitoviany ny hatramin'izay fotsiny. Vetson'ny Fanahy Mazava ho azy, misy vokatra andrasanareo aorian'io hetsika hataonareo io, azonao lazaina ny mpanaraka ny tranonkala ve hoe inona izay? Fifi Razakarison Vokatra handrasana amin'io ny hahatsapan'ireo mpankafy ankehitriny fa tsara ny mamaky ny bokin'ireo pôeta teo aloha fa tsy dia variana ny amin'izao. Ankoatra izany ny hahazoan'ny olona fahalalana mikasika ireo mpanoratra ireo. Vetson'ny Fanahy Ankoatra ny tononkalo izany ve dia hampahafantatra ny mikasika ireo mpanoratra ireo amin'ny mpijery ianareo? Satria ny vokatra andrasanareo dia hoe hahazo fahalalana momba ireo mpanoratra ny mpanatrika. Fifi Razakarison Mampahafantatra amin'ny alalan'ny sary sy ny sorapiainana fohy. Vetson'ny Fanahy Mazava ny amin'iny. Hetsika hitohy ve izy ity sa indray mandeha tsy miverina ihany? Fifi Razakarison Ny tohiny no hisy fa tsy antsan-tononkalo intsony angamba izay ho amin'ity taona ity ihany. Vetson'ny Fanahy Azonao ambara ve ny endrika hisehoany? Fifi Razakarison Io no mbola hodinihina tsara aloha. Tsy voafaritra tsara hatreto. Vetson'ny Fanahy Mankasitraka anao àry. Ento ary ny fanentanana sy ny fampahatsiahivana ity hetsika hataonareo ity. Fifi Razakarison Manentana antsika mpankafy ho avy hianoka pôezia etsy amin'ny Tranombokim-pirenena ny 6 aprily izao fa tsy mbola nandiso fanantenana anao ny Mpizaka STeLaRiM. Any mihaona! Vetson'ny Fanahy Mankasitraka anao nivahiny tato amin'ny tranonkala Pôetawebs, dia mirary fahombiazana feno amin'ny hetsika ataonareo izahay. Fifi Razakarison Misaotra ny Pôetawebs! |
 |
|
©
Pôetawebs
|