Angano sy tapasiry ho an'ny mpianatra

Angano sy tapasiry ho an'ny mpianatra, boky vaovaon'i Narivelo Rajaonarimanana

Toetra Ràja - 17/08/2024

ANGANO SY TAPASIRY HO AN'NY MPIANATRA

Nampihaonina tao amin'ny trano fivarotam-boky Md-Paoly ny sabotsy 17 aogositra 2024 ny sekolin'ny Ntaolo sy ny fampianarana ambaratonga ambony tamin'ny alalan'ny fanolorana ny boky vaovao "Angano sy tapasiry ho an'ny mpianatra". Ny Profesora elanihetezana Narivelo Rajaonarimanana sy ny Maître de conférence Louise Ouvrard izay samy mpampianatra ao amin'ny INALCO Parisy no nanoratra ny boky. Nikarakara ity lanonana ity ny trano fivarotam-boky Md-Paoly Analakely izay mpampiantrano, ny Fitaleavana misahana ny maha Izy ara-kolontsaina, ny Fitaleavan'ny Tranombokim-pirenena, ary ny Profesora Narivelo Rajaonarimanana izay tsy zovina intsony ny maha poeta sy mpikamban'ny tranonkala Poetawebs azy.

Lahateny sy fanentanana

Tamin'ny 10 ora maraina no nanomboka ny fotoana. Nanazava teny am-piandohana ny ho fizotry ny fotoana ireo mpiandraikitra avy tao amin'ny Tranombokim-pirenena, nahitana an'i Patricia lehiben'ny sampandraharahan'ny fampiroboroboana ny rohim-boky sy Irène ary i Sandra. Nanamarika ny fanentanan'izy ireo ny fampandraisana anjara an'ireo mpanatrika mba hampiaina ny fotoana. Nanampy izany koa ny fanentanana ny mpanatrika hanjifa izany bokim-panabeazana vaovao izany.

Nisantatra ny anjara fitenenana i Soeur Isabelle izay mpiandraikitra ny trano fivarotam-boky sady hisahana ny fanjifan'ny besinimaro an'ity boky angano ity. Nisaotra ny mpampiantrano ny Pr Narivelo Rajaonarimanana ary nanazava ny momba ny boky angano. Nanolotra izany ho an'ny Tranombokim-pirenena rahateo koa izy.

Niavaka teny anelanelan'ireo ny fandraisan'anjaran'ny mpianatra L3 Malagasy eny Ankatso toa an'i Fiantsa Hary Dia niantsa ny tononkalo TSY MBA sy Valiha Gasy nanome aina ny ampahan'angano notsoahina tao anatin'ny boky, tak 34 sy tak 264. Nanamarika ny fotoana koa ny fiantsana tononkalo niangalian'ny poeta Lavenona tamin'ny HEREZO NY DIA.

Mpamolavola sy mpanotrona

Namolavola ny fotoana i Tsikimilamina Rakotomavo tale misahana ny maha Izy ara-kolontsaina.
Nanotrona ny lanonana ny mpikamban'ny Akademia toa an'i Nalisoa Ravalitera filoha lefitra sy Oliva Ramavonirina mpikaroky ny foiben'ny teny. Tazana tao an'efitra koa ny mpampianatra avy ao amin'ny INALCO Linah Ravonjiarisoa sy ny mpampianatry ny ENS toa an-dRazanabahiny ary ny mpikaroka Didier Mauro izay naman'ny Pr Narivelo Rajaonarimanana.

Tontolon'ny boky

Mirakitra takila 312 ny boky "Angano sy tapasiry ho an'ny mpianatra" ary voasoratra amin'ny teny malagasy sy teny frantsay. Any amin'ny takila 301-311 no ahitana tovana manazava ny atao hoe angano, ny tantarany, ny endrika isehoany, ny karazana angano, ny drafitry ny angano. Torolalana haifampianatra no lohateniny. Sady boky mirakitra ny soatoavina malagasy amin'ny alalan'ny sekolin'ny Ntaolo ity boky ity no fampianarana mamaky teny amin'ny fiteny roa. Mirakitra angano 59 ny ao anatiny ka nanasokajiana ny anganom-biby sy anganom-piandohana, angano mahazendana sy anganom-pahendrena, anganon-kafetsena sy haranitan-tsaina.

Mandravaka ny atiny ny sary tanan'i Oolou miisa 67. Teza boky no edisiona namolavola azy ary ny Ecoprim Ankorondrano no nanonta. Ny trano fivarotam-boky Md-Paoly Analakely no misahana ny fivarotana.

Tatitra : Toetra Ràja
Sary : Rita

Pr Rajaonarimanana miaraka amin'ireo mpanentan'ny tranombokim-pirenena.
Miankavanana : Irène, Patricia ary Sandra

Soeur Isabelle

Ny Pr Rajaonarimanana

Lavenona, Gasy Valiha ary Fiantsa Hary Dia
miomana hiaka-tsehatra

Ny poeta Lavenona eo am-piantsana tononkalo

Fiantsa Hary Dia miantsa tononkalo

Valiha Gasy nanome aina ny angano

Ny Pr Rajaonarimanana manolotra ny boky an'i Patricia misolo tena ny tranombokim-pirenena

Eo anoloana i Nalisoa Ravalitera sy Oliva Ramavonirina

Eo anoloana i Patricia miaraka amin'ireo masera roa

Ny Pr Rajaonarimanana
sy ny fianakaviamben'ny mpampianatra

Didier Mauro sy i Soeur Isabelle

Ny Pr Rajaonarimanana miaraka amin'ny solotenan'ny Fitaleavana misahana ny maha izy ara-kolontsasina (Rita sy Solohery) ary i Sandra mpanentana ny fotoana