Samy mihazakazaka te hibata fandresena ho filoham-pirenena ireo milaza
tena fa vonona hampandroso haingana an’i Madagasikara. Milaza ny hafa
fa itoeran-karena ny nosintsika; miventy ny sasany fa maro olo-manga
afaka hampisongadina an’i Madagasikara amin’ny sehatra maneran-tany ity
firenena ity. Moa ve tsy efa sambatra ny Malagasy raha ireo no tsara
tantana?
Miantefa indrindra amin’ny
mpitondra
fanjakana ity asasoratr’i Joseph Andrianaivoravelona ity izay
nosoratany ny 24-10-1958 ary mitondra ny lohateny hoe : "Sambatra ny firenena" ity. Anisan’ny
kalo nifaninana ho tononkiram-pirenena izany ary manambara faniriana
lalina tiana hanjaka sy hitoetra eto amin’ny firenena. Ireo
vinam-pampandrosoana tokony hampiharin’ny mpitondra sy ny vokatra
aterak’izany eto amin’ny firenena no fototra ifaharan’ny hafatra
ampitainy amin’izany.
Raha vao fampandrosoana ny firenena
no
ambara dia tsy azo hamaivanina ireo vina samihafa entina hampivoarana
ny fiainam-piarahamonina. Manana andraikitra goavana amin’ny
fampanjariana izany ny mpitondra izay tompon-kevitra amin’ny
famolavolana fandaharanasa ho fanatsarana ny fari-piainan’ny mpiray
tanindrazana. Ny fiorenana amin’ny toe-tsaina mijoro amin’ny
mangarahara izay manda ny tsolotra, ny totohondry vola, ny kejokejo no
manamarika izany.
Hoy indrindra i Joseph
Andrianaivoravelona:
“Ho
mpitondra tsy mba jamban-kolikoly na voavidy
Mahatoky sady marina, mampiasa ny safidy”
Ny fandalana ny fahamarinana eo
amin’ny
fitantanan-draharaham-panjakana no manefy ny rehetra isan’ambaratonga
tsy hibirioka amin’ny tandrevaka samihafa izay mamarina ny toe-tsaina.
Manamafy ny fanarahan-dalàna ny fifikirana amin’ny rariny itompoana.
Koa izay mivily amin’izany no menatra eo anatrehan’ny tany ama-monina.
Toe-tsaina efa nolalain’ny mpialoha
lalana hatrizay ny fandalana ny marina, koa misy akony tsara ny
fiainana izany.
Maro tokoa ireo fiantraika tsara
ateraky ny fanaovana ny marina. Ny mpitondra eto anivon’ny firenena no
tokony ho fitaratra tsy mandainga amin’ny fampiharana izany. Koa rehefa
miezaka manasongadina ny fomba fisaina feno fahitsiana ny mpitarika dia
azo antoka ny fitonian’ny fiarahamonina. Tsy misy ny fitanilana, mandao
ny rehetra ny fitiavan-tena sy fitiavam-bola ary manjaka ny
fifampitokisana eo amin’ny samy mpiara-belona.
Hamafisin’ny voalaza izany amin’ny
hoe :
"Hampanjaka
ny fandriam-pahaleman-tsarobidy"
Miankina tanteraka amin’ny
tari-dalana
feno fahendrena avy amin’ny mpitondra araka izany ny fandaminana ny
tontolo iaraha-mivelona.
Raha tiana hiaina sy hianoka ny
fiadanan-tsaina ny mpiara-belona eto amin’ny firenena dia zava-dehibe
ny fandalana ny marina. Tsy kobaka am-bava na volana hatenda fotsiny no
ambara fa tena iainana eo anivon’ny rafitra rehetra misy eto amin’ny
tany sy ny firenena. Ny fametrahana ny didy aman-dalàna sy ny
fampiharana izany dia mahomby raha toa ka mipaka amin’ny sokajin’olona
tsy fidian-tsy avahana. Koa manaitra ny rehetra, indrindra ireo
mieritreritra ny hitondra firenena ny tononkalo mba hampanjaka ny
marina, ny rariny ahafahana manao ny hitsiny.
