Ny poeta raha miteny   dia mampita izay mba reny  sady saininy ombieny   amin'ny gadona avo lenta   mampitony hetaheta :  bitsik'ivan'ny poeta. (T.Ràja) 26 ôktôbra 2018

IMBITIKA RAMBALA MITAFA AMOROM-PATANA

Poeta tsy zoviana amintsika mpisera eto amin’ny tambazotran-tserasera i Imbitika Rambala. Poeta miavaka satria mampita fomba fijery izay manoro sy manitsy ny mpiara-belona hanana fisainana mendrika kokoa. Indro aroso anao àry ny tafa amorom-patana niarahany tamin’i Tsikimilamina RAKOTOMAVO.

Tsikimilamina RAKOTOMAVO (TR)
Miarahaba anao Imbitika Rambala! Efa ela ihany isika no nifanerasera fa izao angamba no fotoana mety indrindra hamosahana izay rehetra tsara ho fantatra momba anao sy ny tontolonao.

Imbitika Rambala
Miarahaba anao Tsikimilamina nanasa ahy ho eto amorom-patana amin’ity andro manorana ity ary mankasitraka anao sy ny Pôetawebs manome hasina ny poeta indrindra ny poezia Malagasy.

TR
Hisantarana ny tafa àry dia ambarambarao Imbitika Rambala sy ny tontolony...

Imbitika Rambala RAMBOANOMENTSOANDRAINY Max Edmond no tena anarako, teraka tao Alakamisy Ambohimaha – Fianarantsoa ny 29 aogositra 1944. RAMELIARINORO Marie Thérèse no anaran’ny vadiko. 52 taona nivadiana izahay; 4 ny zanakay fa ny zokiny indrindra maty vao telo taona izay. 9 ny isan’ny zafikelinay. Avy any Ambohitrombihavana (Antananarivo) ny raiko RODILSON Dominique ary avy any Ambatomanga (Antananarivo) ny reniko Razanabelosoa Marcelline. Nila ravinahitra tany Fianarantsoa ny razamben’izy ireo teo amin’ilay tanàna atao hoe Alakamisy Ambohimaha. Azoko lazaina aza fa isan’ireo namorona io tanàna io ireo razambe ireo noho ny habetsahan’ny tany sy trano navelan’izy ireo satria mpiavy avokoa ny mponina tamin’io tanàna io tamin’izany fotoana izany. 25 km tsy hahatongavana ao Fianarantsoa raha avy aty avaratra no misy an’Alakamisy Ambohimaha eo amin’ny lalam-pirenena faha 7. Teo amin’io tanàna kely io ny fahazazako hatramin’ny faha 12-ny taonako vao nankeny Fianarantsoa nanohy ny fianarako. TR Hono ho’aho, inona no hevitry ny hoe Imbitika Rambala? Imbitika Rambala Ilay hoe Imbitika angamba dia mora fantarina satria avy amin’ny fototeny hoe "bitika" na kely ka ny Imbitika izany dia "ilaikely". Ao amin'ny Rambala kosa dia ahitana ny fototeny "vala". Ny "vala" dia toerana izay itobiana. Any Fianarantsoa any ny hoe "Ambala" dia entina hilazana ilay toerana onenana, nibeazana, izay matetika any ambanivohitra, ny hoe "hody any Ambala" dia hody any an-tanàna, any aminay. Ny "kiambala" na "Rambala" dia avy any ambanivohitra - ho fahatsiarovana ilay toerana nifoizana re!
TR Azo ambara ve ny anton-draharahanao andavanandro? Imbitika Rambala Tsy dia misy fa araka ny voalaza ao amin’ny "ERI-MASO 1" dia misaintsaina ny fahiny e! ...ary dia manoratsoratra eny. Ny soratra indray dia baikoin’ny zava-misy eo amin’ny fiarahamonina sy eto amin’ny Firenena matetika, dia miezaka mba manao "bonzaï"! TR Mpanoratra sy poety i Imbitika Rambala, mivondrona ao anatin’ny fikambanana literatiora ve? Imbitika Rambala Tsia
TR Inona no hitanao ho lesoka tsy mampandroso ny fikambanana literatiora eto amintsika? Imbitika Rambala Toy ny fikambanana rehetra dia tsy maintsy misy hatrany ny mpitarika. Hitako sy reko amin’ny fitaovan-tserasera misy eto amintsika ireny fa tena miezaka ireo mpitarika fikambanana literatiora eto amintsika mampahafantatra sy mampisy lanja ny fikambanana ary mampiroborobo ny teny malagasy amin’ny alalan’ny fampirantiana, fiantsana, lahadinika sy lahatrasa samihafa. Iderako azy ireo izany! Amiko dia tsy ampy izany satria ny anisan’ny endrika ijoroan’ny fikambanana iray dia ny fifanampiana indrindra ny fanabeazana. Mety raha hasiana tahirin-kevitra sy tahirina literatiora, boky, gazety mipetraka lalandava ao amin’ny foibe ho azon’ny mpikambana hokirakiraina sy hanovozany hevitra amam-pahalalana. Moa ve tsy rariny raha manome maimaimpoana amin’ireo sanganasany avy ireo nahatafavoaka boky mba hanampiana ireo mpikambana sasany. Matetika dia efa ampolo taonany maro no efa nijoroan'ny fikambanana literatiora iray. Maro toa izany koa ireo efa tafita sy nahazo soa tao amin’izany fikambanana izany. Betsaka amin’izy ireny aza no efa andrarezin’ny literatiora. Ekeko koa fa samy mitana andraikitra mavesatra avy izy ireny ka mba hanosehana ireo zandry tena liana hahomby eo amin’ny sehatry ny asa soratra dia mba hanokana andro iray avy ny tsirairay amin’izy ireny mba hihaona amin’ireo zandry ireo, hitafatafana sy hanorotoroana azy ireo na dia eo amin’ny tsipelina ihany aza izay hitako fa efa tandindonin-doza be ihany. Sady mifanerasera sy mifankahafantatra tsara amin’izay fotoana izay fa tsy sanatria isaky ny lanonana vao mifankahalala. TR Raha ny fijerinao, inona no toetra tokony hananan’ny mpitarika fikambanana, na ny sehatra hafa koa aza? Imbitika Rambala Ny mpampianatra sy ny mpitarika dia mitovy ihany : manana ny ampy tokony hozarainy izy ary mahalala amin’ny antsipiriany ny olona tarihiny ka mahatsirika ny tokony hatolotra ny tsirairay amin’ny fotoana tokony hanaovana izany. TR Ny nahafantarako anao Imbitika Rambala dia ny fahaizanao mamorona tantara ary saika mandeha amin’ny onjam-peo hatrany izany. Inona avy ireo talenta miafina ao aminao ? Imbitika Rambala Talenta hoy ianao? Tsy dia izay angamba no ilazako azy! Raha ny tantara amin’ny onjam-peo manokana (film radiophonique) dia nampianarina aho hanoratra an’ireny ary nisy fotoana aza nataoko asa fitadiavam-bola izany, na dia tsy mahavelona aza (ho ahy aloha). Noho izany dia heveriko hoy toy ny asa rehetra izay natao hahazoam-bola ny fanoratana tantara amin’ny onjam-peo. Ekeko kosa anefa fa tsy manoratsora-poana aho matoa matetika misy miantso aorian’ny fivoahan’ireny tantarana an’onjam-peo ireny. Raha ny hoe talenta miafina indray dia tsy izany afenina izany fa aseho e! Hafatra apetrako amin-janako sy ny zafikeliko mantsy no tena tanjoko fa tsy sanatriavin’ny vava ka entina hitadiavana laza amam-boninahitra na harena ireny. Fitohizan’ny fanabeazako azy ireo amin’ny fomba hafa koa izany. Koa namoron-kira aho, manoratra tantara fohy (nouvelles) ho azy ireo ary tsy azo atao lava satria fantatsika fa tsy dia mamaky boky loatra ny ankizy ankehitriny. Dia toa ireny nataon’ny Ntaolo ireny no ataoko re saingy mba amin’ny fomba hafa e! Ary farany... ny tononkalo! TR Horesahintsika bebe kokoa ny momba izay tononkalo izay. Firy izao ny efa voasoratrao? Imbitika Rambala 100 mahery kely. TR Inona no hevitra voizinao matetika ao amin’izy ireo? Imbitika Rambala Mahakasika ny fiainana andavanandro ny 60%-ny mahery, dia ny resaka tanindrazana no manaraka ary ny mikasika ny fitiavana. TR Ireny arosonao amin’ny Fesiboky ireny ve tononkalonao avokoa? Imbitika Rambala Hatreto aloha dia izay! TR Afaka manome santionany vitsivitsy ve ianao?

Imbitika Rambala

Indro àry aloha ny momba ny fitiavana. NY LASANAO Sombinaina Ny lasa sy fahininao Io no maha ianao anao Anao ireo ka hajaina Fa ny ho avy no antsika Io no andrandraina Fa izaho no tsy nisaina Sombinaina Ny tsiambararoa no tsy lazaina Dia tsy hoe fitia malaindaina Koa miaiky aho fa mafy loatra Izay notakiako Satria ny am-ponao tsy miloatra No nampiako Toa tsy fitokiana O ry tiana Koa dia lasa ianao Nandao ity akany Navelanao tsotra izao Ireo vinantsika mamy Ary marina ny anao Imbitika Rambala - 22/12/17

Eo amin’ny fiarahamonina ASA E ! Dada o Rehefa mizinizinim-pandrosoana Ve ny foko sy ny saiko Efa vonton’ny fanoloana Ny avy any Andafy ny fanahiko Dia mino ve ianao fa nahiko Ary sahiko Ny hanary ny maha Gasilahy ahy Neny o Ketraka ianao fa voaketoka Tsy maha hetsika Ny safidiko Fa namidiko Amin-dry zareo Vahiny Ka dia borona aho ankehitriny Dia indrana sisa fiainako Folaka hatramin’ny fisainako Ary tsy misy henatra intsony aho izao Ka dia mino tokoa ve ianao Fa nariako ny maha Gasivavy ahy Fa na ny teny na ny soratra Mbola izaho no voatoraka Ny fomban-drazana fahiny Mbola izaho no omena tsiny Izaho tokoa ve no kamo nianatra Sao kosa ireo mpampianatra Ireo no tsy mahafehy Iza koa no misintona kofehy Ka mikajy sy mandrindra No izaho no ratsy indrindra Dada o..neny o ASA E ! Imbitika Rambala - 17/03/17

Fianam-pirenena O RY RAZAKO O, MIFOHAZA Ampireheto indray Ilay jabora mifangaro molaly Amin’izato zavany mihalotralona Hampahatsiahy Ilay oko nentina hamaly Famoretana nampivalombalona Ampahatsiahivo indray Ilay takariva amorom-patana Sy ireo angano nenti-nanabe Ka nampivaivay Ny Fitiavan-Tanindrazana Izay nosoloina fitiavam-bola be Ilay tananao ry neny Nanoso-menaka ny handrina Mba tsy hataho-maso mena Taneho anaty memy Hangotraka ho entina hifanandrina Amin’ireto mpambotry firenena Ianareo re ry Razako Raha mihaino ihany He ity Tanindrazana Izay navelanareo Jereo fa mitoreo Satria potika sy rotika ary kotika Nefa mbola misy ihany Mahasahy mandà izany Sy miedinedina fiteny Fa mety ny ataon’izy ireny Imbitika Rambala - 23/02/18

TR Natsidikao teny am-piandohana ny "ERI-MASO 1". Hazavao tsara ho fantatry ny mpankafy literatiora hoe ny momba izany vaovao tsara izany! Imbitika Rambala Vita tokoa ny boky voalohany nomena ny anarana hoe ERI-MASO 1, izany hoe mbola hisy ny manaraka sady misy tantara mitohy tokoa ao. Ny hoe ERI-MASO dia eritreritra vokatry ny hitan’ny maso hatramin’izay nisokafany mandra-pikimpiny - mandra-pahasalama saina koa e! Hahaha! Mizara telo miavaka tsara ny boky dia ireo tononkalo, ireo tantara fohy ary ireo tantara nohainoana tao amin’ny onjam-peo. Ao aoriana ao anefa dia tsy maintsy hatao boky iray ihany ny sasantsasany amin’ireo tantara tao amin’ny onjam-peo satria misy lava dia lava toa ilay hoe "sambotra andrisa" izay mahatratra 499 pejy ary navoakan’ny Radio Don Bosco. Mety hanontany angamba ianao hoe nahoana no tsy natao boky iray isan-tsokajiny? Tsotra ny valiny : fantatro fa tsy manam-paharetana hifantoka amina boky iray izany ny zanako sy ny zafikeliko, ary natao vitsivitsy koa ny isan’ny pejy, manodidina ny 100 eo.

TR Voalohan-teninao ao amin'ny fanolorana ny boky ny hoe "Amin'izao androm-pahosako izao dia mitsiahy ireo fahiny sisa azo atao". Midika ve izany fa ao anatin'ny fahatoniana tanteraka ianao ankehitriny anaposahana ny miavosa sy matevina? Imbitika Rambala Rariny tokoa angamba raha mitsiahy ny fahiny sisa... Hiahy inona intsony moa! Ao ny fahasoavan’Andriamanitra izay mbola mitahy ahafahana mameno ny tsy ampy tamin’ireo fitaizana fahiny ny ankizy. Ireo ankizy koa manjohy akaiky dia akaiky anay mivady; ny tena efa osaosa ihany.

TR
Momba izay fahiny miavosa izay ihany, inona avy ireo fikambanana nisy anao na niarahanao niasa?

Imbitika Rambala
Tsy haiko loatra aloha fa toa olon-dia (sauvage) izay izaho ity fa tsy dia mahazoazo ny mifangaro aman’olona. Na izany aza dia nihelina kely tao amin’ny Faribolana Sandratra aho rehefa notarihin’i Solofo José ary nandalo tao amin’ny Havàtsa-Upem koa.

TR
Mety ho nisy fahombiazana naterany?

Imbitika Rambala
Tsy haiko loatra fa ny nahafinaritra ahy dia ny nahita ny fahavitrihan’ireo mpitantana ihany izay nikely aina hampanjary ny teny malagasy sy hanampy ireo poeta sy mpanoratra.

TR
Ampahatsiahivo kely hoe Imbitika Rambala, raha sitrakao, ny toetoetry ny boky! Ary misy antony ve no mahatonga ny tononkalo ao ho vitsivitsy?

Imbitika Rambala
Araka ny efa voalazako teny ambony dia mizara telo miavaka tsara ny ao anaty boky dia ny tononkalo, ny tantara fohy ary ireo tantara nivoaka tao amin’ny onjam-peo samihafa. Ny isan’ny takila dia tsy atao be fa eo amin’ny 100 eo ho eo ihany. Tsy hoe atao ambin-javatra ny tononkalo sanatria fa mipetraka amin’ilay fotokevitra hoe boky natao hitondra hafatra ao anaty fialamboly : zavatra fohy ka azo iverenana foana amin’ny fotoana ilàna azy, tsy hahamonaina e!

TR
Ny fahafantarako anao Imbitika Rambala dia olona feno fahatsorana ary tia mizara ho an’ny hafa. Efa fantapantatrao ve ny fomba hampielezana an’io boky io?

Imbitika Rambala
Hahaha! Misaotra aloha amin’ilay hoe feno fahatsorana e! Raha ny marina dia volan’ny ankizy daholo matoa tontosa io boky io, noho izany dia rariny raha mba miverina ny volan’ny ankizy (sao tsy hampiany eo amin’ny manaraka, hahaha!). Ao amin’ny Librairie Mixte eo Analakely no ahitana ny boky ary any amin’ny Librairie Saint-Paul Ambatomena Fianarantsoa.

TR
Voalazanao tany am-boalohany fa "Tandindonin-doza" ny tsipelina ankehitriny. Fa ahoana?

Imbitika Rambala
Tsoriko aloha fa tena sarotra ny tsipelin’ny teny malagasy. Tena sarotra amiko aloha e! Ary toa miovaova be ihany; ho fanatsarana angamba izany! Ohatra : taloha dia eo amin’ny "antépénultieme" ny tsindrim-peo rehefa miafara amin’ny "ina" ny teny iray, kanefa ankehitriny toa tsy izany indray ka very aho ary mitsotra an’izany. Jereo tsara ange ity : "vidina" indray no izy fa tsy "vidiana" nefa "ariana" koa fa tsy "arina"... dia very aho!
Noho ny fanatontoloana dia maro ireo teny vaovao izay tsy maintsy hosoratana dia samy manao izay ahaizany azy na mamorona fanoratra hafa.
Ny tambazotran-tserasera koa manampy trotraka noho ny tsy fanomezana lanja ny tsipelina. Misy aza moa dia ovaina mihitsy ny teny toy ny "indry" lasa "njy"... ary ny fanafohezan-teny sy ny teny angilisy indray no avoitra.
Ary ny tena mampalahelo dia tsy misy ezaka hiala amin’izany ireo tanora ka ny tena loza dia raha tsy mandiso sady tsy manaraka ny hadisoana ataon’ny sasany dia mahamenatra.

TR
Mahafaly anay indrindra raha mampita hafatra ho an’ny Pôeta, ny tanora, ny tomponandraikitra amin’ny sehatra rehetra eto amin’ny firenena ianao.

Imbitika Rambala
Ny mba hevitro dia izao : matoa tonga ety an-tany ny olona iray dia misy iraka ampanaovina azy mandra-pahatapitra ny ainy. Iraka eo amin’ny ankohonany, eo amin’ny fianakaviany eo amin’ny fiarahamonina sy ny fireneny, ary tsy misy afa-miala amin’izany raha tsy ny adala sy ny very saina nefa moa dia misy ny minia ho adala na dia tsy very saina aza. Koa aza misalasala manatontosa ny iraka tandrify azy tsirairay avy. Tsy mora izany nefa izay no maha olona antsika. Alao hery ary e fa mila mafy antsika ity Tanindrazantsika ity!

TR
Mankasitraka indrindra Imbitika Rambala nanaiky nitapatapakahitra teto amorom-patana. Maniry indrindra anao ho ela velona hiriaria amin’ny ankohonana indrindra ny mpikirarkira ny literatiora Malagasy.

Imbitika Rambala
Misaotra indrindra anao Tsikimilamina RAKOTOMAVO mba niondrika tamin’itony antidahy itony. Ialan-tsiny ny tsipelina diso ary antenaiko fa tsy nandiso fanantenana anao izay tafa nifanaovana izay. Ho tonga aminao araka izay itiavanao azy anie ny kasainao rehetra ary hiroborobo fatratra anie ny teny malagasy!
Mankasitraka tompoko!

TONONKALO TSARA HO FANTATRA
ANGAMBA LEITSY Angamba leitsy Ho nanaiky aho fa resy Ka dia hanaraka an’ialahy Satria izaho koa ange mba sahy Raha mbola halatra fitia Fahafirin’iza moa izay izaho No hampangina lava izao Ny hetahetam-pitiavana Koa tsy mila hotambazana Raha miaraka amin’ialahy Ny fahotana amin’ny fitiavana Dia tsy misy hahatazana Satria tsy zazakely isika Ary tsy ho sarotra ny handika Izay didin’ny finoana Koa angamba leitsy Tena ho mety Ny miaraka amin’ialahy Ialahy koa manintona ahy Fa matoa aho no tsy sahy Dia noho ny toetran’ialahy Imbitika Rambala 06/16	INY OLONA INY Iny olona iny tsy tanako fa lasa Nijadonjadon-tongotra nirehaka fa hiala Nphamavoiny avokoa izay niarahana nikasa Nivazavaza ery toy ny efa lasa adala Iny olona iny tsy ampy azy ny fitiavako Fa misy hono any fitia tanteraka sy feno Tsy voaanatro intsony fa angamba ny fitaizako Sy izay nitaizana azy tsy afaka hifameno Iny olona iny lasa niporitsaka Tena mety ve ny azy sa ny vintako no ratsy Sa diso notiavina koa dia manitsakitsaka Raha izany kosa re hadalana ny azy Imbitka Rambala - 02/05/18	ADEDAKY NY LAINGA Toy ny hazo mijoala izay notinapaka Tsy maty tsy akory fa mbola hisolofo Ny tolon’ny vahoaka natao ambany rampaka Tsy boboka izany ary tsy mety ny hiofo Ny vahoaka mangina tsy resy tsy akory Na reraka ny aina tsy mitsaha-mivavaka Ny Razana koa ange dia tsy hoe resin-tory Fa ny lainga atao raha feno dia raraka Ny afon’ny tolona ange entina misaina Ka na mitsilopy aza mbola ao fa tsy maty Na dia haningotra aza hatramin’ny aina Tsy maintsy hadedaky ny lainga nafafy Imbitika Rambala - 07/04/18
NY TOKATRANOKELINTSIKA Raha nandoa anao ny rehetra noho ilay fitia nozaraina Dia nitazona ahy kosa ianao noho ilay fitiavan-tsombiniaina Nitelomanao mangidy aho novingitinao teny foana Nefa dia nalain’ny reliziozy rehefa feno fito taona Dia niampy indray ny ratranao ny saiko koa nararirary Ilay "fitotaonantsika" norombahina an-karihary Tsy ho vitanao hono aho nefa tsy hain’izy ireny Fa tsy misy ary koa tsy hisy mihoatra ny anilanao ry neny Herim-po herin-tsaina no nisikinanao hatrany Tao anaty tsy fisiana noho ny fitiavanao ahy ihany Ny fihafiana ny tsy fananana mamy ho ahy ireny Nanefy ahy tokoa satria tsy lahatra fa an-tery Ny masoko mipitrapitra ny masonao manganohano Eo anatrehan’ny entakeliko handao ity tokantrano Tokantranokelintsika tany fady ho an’ny havana Tokantranom-piafiana niangaran’ireo razana Imbitika Rambala - 08/03/18	INAY AHO MBA IALAHY Biriky fiara amin’izany No atosika amin’ny tany Mihosim-bovoka tanteraka Minaonaona tsy reraka Ialahy ry boay kely Ny kilaoty mibaroraka Fa ngeza loatra ho an’ialahy Dia tazonina tsy hirotsaka Sady manenjika an-dry zalahy Mandeha mitifi-borona Ny volo misaritaka Ny tarehy misolitika Dia io ialahy mihorakoraka Farim-peo mila ho torana Mampiady ilay ganifa Ry boay kely tiako loatra Tso-piaina tso-panahy Tsy misy iry tafahoatra Tsy misy koa ahiahy Inay aho mba ialahy Imbitika Rambala - 31/03/18	TODY HOY IANAO "Tody hoy ianao?... fisainana ntaolo izany Fa ny fetsifetsy ihany no tafita eto an-tany" Dia izany ve no hiainana nefa isika Malagasy Fa alevina ny marina alevina ho faty Fa ianao ilay antenaina ho vato hifaharana No namadika ny lalàna ho feno fiangarana Ka manindry hazo lena sy manao zana-drafy "Ny tody mbola ho ela ve no tsy hanaovan-dratsy" Toa miangatra ny lanitra fa ny vono olona avy No tsy misy tody ary koa tsy mahavoasazy Hatramin’ny halatra aza sy ny fivarotan-Tanindrazana Dia sahy nototofana hangina tsy hotazana Fa nankaiza loatra lahy ny soa notoavina fahiny Fa soa toavina hafa indray soa toavina vahiny No nasolo ny antsika ka "Ny vola no andrianina Koa ambakao ny tsy mahay dia poteho tsy hotafarina" Ny Andriamanitray tokoa angamba no ela fidona Dia manararao-pahefana sy mamono ny finoana Nitaizan’ny Ntaolo anao hoe : "mba hajao ny mahaolona Fa tsy ny Malagasy kely no ataonao sorona" Imbitika Rambala - 12/09/18
ZOKY A Hoy izahay mantsy anao : "Mifarana eto indray ny taona Tsy mety re fa minaona Ny fotoana maro tsy dia ela Tsy voafafa fa tavela Ary mbola tsy manolatra Ireo ratra hatrizay Dia inty miampy trotraka Ny fahantrana mahamay" Hoy ianao mantsy anay : "Mahamay nefa tsy mahafay Raha fahantrana no hita Dia inona no zava-bita Sy mba ezaka hialana Amin’izany Fa dia faly mitorevaka Lava lela sy be resaka Kinga ery manome tsiny Tsy misy akory izay mba ezaka Fa mitomany ny fahiny Faly ery mitsikera" "Fa angaha moa ianao mba niera Raha nihinana niletra Nandidididy tsy nisy fetra Ny lovantsika ikambanana Izay tavazinao sy ibahanana Nefa viviny sy venty No omenao mba hita Dia io ity ianao mba miventy Fa ianao no mahavita Midedadedaka fiteny Manao angano lavareny Manodinkodina fisaina Dia mahita ho tantaraina Sy manao izay fikafika Hilazana lava izao Fa tena manja ny antsika" Koa Hoy izay mantsy anao "Zoky ianao ka hajaina Aoka re tsy hihenahena Ny fetsifetsy ampy izay Aza raisianao ho halemena Ny fandeferanay" Imbitika Rambala - 29/12/17	PAO-TSATROKA Fa ny azy Tsy nanitsaka sekoly Tsy nahita kolikoly Fa ny tanam-polony No nataony solon’ny Solaitra sy penina Tsy an-kimenomenona Izay mba tao an-tsainy Izay mba kely hainy Izay mba kely hitany No mamaritra izay vitany Dia Miainga vao maraina Tsy mba mitaraina Dia indry mivikiviky Miloloha ny sobiky Sy mivimbina akalana Mamonjy sisin-dalana Ka Ny tombony mba azony Amin’ireto mangahazony No miantoka ny sisa Dia i Soa marisarisa I Koto handeha hianatra Ny trosan’ny ao avaratra Ny savony sy vilany Hiantohana avy izany Koa Anjara ratsy ve ny azy Lahatra tokoa sa ve sazy Saingy ny azoko atao Dia pao-tsatroka aminao Imbitika Rambala - 16/05/18	INY ADALAKO INY Tompo ô, Izaho manaiky saingy Iny adalako iny Aza atao mandraingirainy Aza dia sedraina mafy Tsy maninona raha mihafy Sao tsy ho zakan’ny finoany Satria tsy misy hadisoany Fa izaho no tsy mahay Tsy nahay nampifandray Izay tokony hampitaina Tamin’ny fanahy sy ny saina Tompo ô, Izao re no mba sitrako Fenoy izay tsy vitako Tamin’iny adalako iny Fa nibirioka indraindray Ny fifandraisanay Raha izy mba nanadina Fa mba te hampisongadina Ny maha izy azy Fa ny ahy ny hanasazy Izay no tao an-tsaiko Satria izay no mba haiko Tompo ô, Be ny zavatra tsy vitako Ka aoka re izay tsiniko Sy ireo ditrako fahiny Raha toa misy valiny Tsy hotakianao aminy Be koa ny tsy voapitako Koa amin’ny lalana hombany Sy amin’izay rehetra hataony Ianao ihany no hantsoiny Ianao irery ihany no hotompoiny Tompo ô, Aoka ho ahy re ny tsiny Fa tsy ho an’iny adalako iny Amena Imbitika Rambala - 14/09/18

Pôetawebs©2018 - poetawebs@gmail.com