Ny poeta raha miteny Dia mampita izay mba reny Sady saininy ombieny Amin'ny gadona avo lenta Mampitony hetaheta Bitsik'ivan'ny poeta. (T.Ràja) 01 Aogositra 2015

TATITRA KALO FITIA : ANTSAN-TONONKALON'I RIVA (SANDRATRA)

Na dia vao sambany ihany aza ny nanaovan'i Riva  hetsika teto Antananarivo, dia hipoka tanteraka ny efitra malalaky ny CGM ny alarobia 15 jolay 2015 teo.

Nanokatra ny fotoana i Niry-Solosoa izay namaky koa ny teny fanolorana nosoratan'i Tahirintsoa ao amin'ny boky. Nanampy an'i Riva, indrindra fa tamin'ny fiantsana koa ireo namany, tsy iza izany fa i Liantsoa, Lefitra, Jery, Tahirintsoa, Narindra ary Ratsifa. Izany no natao dia ho fanomezana hasina ireo karazan-tsoratry Riva toy ny riankalo, ny sombin-dahatsoratra, ny sombin-tantara, ny tononkalo sy ny sisa izay milaza ny fiainana andavanandro, ny fitiavana  mampieritreritra, ao ny mampalahelo ary ao ireo miendrika hatsikana.

Mainka moa fa norotsian'ny feo mangan'i Voara ao amin'ny tarika Fangia Kalo Gasy tamin'ny hira kalon'ny fahiny sy ba gasy manavanana azy ka dia nianoka ny kanto roa sosona ny mpanatrika.

Tatitra sy sary : Ikaloyna

Tahirintsoa	Voara sy Niry-Solosoa
Narindra	Ratsifa
	Riva notronin'ireo namany
Liantsoa
Fangia Kalo Gasy	Ireo mpijery nianoka