 |
PÔETAWEBS | ||
| Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.
Ràja
|
 |
"Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto". 27
febroary 2021
|
|
 |
| Mino
ny Malagasy fa misy ny fiainana any ankoatra izay heverina fa tontolo
misy ny razana. Miresaka momba ny maty sy ny velona indrindra ny
tononkalo nosoratan'i DOX izay nampitondrainy lohateny hoe "Tsy hodinganina ny maty" ary
notsoahina tao amin'ny boky Folihala
tak 181. Asehony amin'izany fa manana ny lanjany eo anivon'ny
fiarahamonina malagasy ny finoana ny razana.Koa mba hahafahana
mandalina izany bebe kokoa dia hohadihadiana mialoha ny fifandraisan'ny
velona sy ny maty. Aorian'izay kosa no hanehoana mazava ireo adidy
miandry ny velona. Ireo fizarana roa miavaka tsara ireo no entina
hanasongadinana fa tsy tapaka tanteraka akory ny serasera eo amin'ny
velona sy ny maty. *
Hanombohana ny
fanadihadiana dia avohitra ny endriky ny fifandraisan'ny velona sy ny
maty. * * |
TSY HODINGANINA NY MATY Hotapahintsika tohy amintsika ve ny maty Fa variana miaina isika? Tsia fa tsapantsika anaty Ny fitohizantsika aminy… sady isika taizany aza, Novolainy fahavelona, notezainy fahazaza! Na ny maty na ny velona, mpianakavy iray ihany! Mbola homba antsika ihany ireo efa nody tany, Misy trosantsika aminy... nefa izany dia ho efaina Amin'ny taranantsika : izay no fitohizan'aina! Nanaovan-dalana isika ka tsy maintsy hanao lalana! Nananganana tanàna ka tsy hahazo hialangalana, Namelana fahendrena ka tsy maintsy hamela hafatra, Mba ho anatry ny velona, ireo maty dia miteny Moa avela ho faty maso, sanatria, ny fahendreny? Tsy hodinganina ny maty amin'ny tohatoha-miakatra DOX |
|
Voalohany indrindra dia hita fa misy ny fiombonan'ny razana sy ny velona. Indraindray mantsy toa misalasala sy miahiahy ny olona ny amin'ny tena hisarahan'ny maty sy ny velona. Ny lahatsoratra anefa milaza hoe: "Na ny maty na ny
velona, mpianakavy iray ihany!"
Misy fitohizany hatrany ny fifandraisan'izy ireo araka izany. Tsapa ihany koa fa mifanjohy hatrany ny maty sy ny velona eo amin'ny tontolon'ny riba malagasy. Hamarinin'ny lahatsoratra izany manao hoe: "Tsia fa
tsapantsika anaty ny fitohizantsika aminy"
Tsikaritra fa mamela lova ho an'ireo mpandimby izy ireny mba hitsinjovany ny taranaka any aoriana. Manamarika hatrany ny fifandraisana izany. Hita taratra fa mitahy ny velona ny razana ary inoan'izy ireo izany. Midika izay fa misy fikarakarana ataon'ny maty amin'ny velona mbola miaina. Manamafy izany ny lahatsoratra manao hoe: "mbola homba
antsika ihany ireo efa nody tany"
Ireo rehetra voambara teo ireo dia maneho fa tsy afa-misaraka mihitsy ny maty sy ny velona eo amin'ny fiarahamonina malagasy. Raha nodinihina teo ny fifandraisan'ny maty sy ny velona dia andeha hohalalinina ny adidy miandry ny velona. *
Eo anatrehan'ny vitan'ireo loharano nipoirana izay nikolokolo sy nitaiza dia rariny raha tohizana ny asany. Hamarinin'ny lahatsoratra izany manao hoe: "Nanaovan-dalana
isika ka tsy maintsy hanao lalana!"
Manana andraikitra hanatsara hatrany izay nataon'ny teo aloha araka izany ny miaina ankehitriny mba hanehoana ny fitohizan'aina sy ny asa natao. Anisan'ny adidy miandry ny velona ihany koa ny fandraisana ny anatry ny maty. Hoy ny lahatsoratra: "Mba ho anatry ny
velona, ireo maty dia miteny"
Ny fanajana ny razana no tena ifotoran'ity hevitra ity satria efa foto-pisainana tsy afa-miala amin'ny Malagasy izany. Ny tena adidy goavana tokony horaisin'ny velona dia ny fanehoana ny tsaran'ny razana. Hoy Dox: "Moa avela ho faty
maso, sanatria ny fahendreny?"
Fameloma-maso ireo loharano nipoirana sady fanehoana ny maha Malagasy ny fanasongadinana ireny soatoavina malagasy ireny. Izay rehetra voalaza teo dia ahitana taratra tokoa ny fifandraisan'ny maty sy ny velona eo anivon'ny fiarahamonina. *
Ny resaka
rehetra natao teo no nahafantarana fa mbola manana ny lanjany eo
anatrehan'ny fiarahamonina malagasy ny finoana ny razana. Mampiahiahy
anefa amin'izao fotoana izao ny fifandraisan'ny velona sy ny maty na
dia heverina fa misy aza ny fifamatorana ary hinoana fa mitahy ny
razana. Eo anatrehan'izany rehetra izany dia misy ny adidy miandry ny
velona dia ny famelana lova ho an'ireo taranaka mifandimby. Raha ny
tononkalon'i DOX kosa no asian-teny dia tsapa fa manoro ny
mpiara-belona aminy izy mba hanaja ny soatoavina malagasy dia ny
finoana ny razana. * * Tsikimilamina Rakotomavo
|
||
|
©
Pôetawebs
|
Date de dernière mise à jour : 27/02/2021