| PÔETAWEBS | "Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto" 27 jolay 2020 |
||
 |
Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.Ràja |
 |
|
 |
Tononkalon'i
Tsy Avahana Nanadihady : Faniry Ezeckiel |
 |
| Tsy Avahana | Faniry Ezeckiel |
| Ny
pôeta dia ilay olona itoeran’ny aingam-panahy ka mandrafitra izany
an-tononkalo. Ny amin’izay indrindra no itodihan’ity tononkalo iray
nosoratan’i Tsy Avahana haroso hohadihadiana ity. Asa soratra izay
manasongadina indrindra ny lanjan’ny pôeta eo anivon’ny fiarahamonina.
Azo zaraina roa mazava tsara ny hevi-dehibe raketin’ity tononkalo ity.
Ventesiny eny am-piandohana ny famaritan’ny mpiara-belona ny atao hoe
pôeta ary manaraka izany dia asehon’ny mpanoratra ny anjara toeran’izy
ireny eo amin’ny fiarahamonina. *
* * Ahoana tokoa moa ny fiheveran’ny olona sasany ny atao hoe pôeta? Fijery ivelany fotsiny ihany no hamaritan’izy ireo ny pôeta hany ka tsy mahita afa-tsy ny ratsy, izay tsy mifanaraka amin’ny eritreriny izy ireo. Voalohany dia tsarain’ny manodidina ho tsy mahay mitondra tena ny pôeta. Olon’ny fo ka manao vava tsy ambina ary manao zavatra tsy am-piheverana. ”Mifiavin-dranotrambo, mifanahin-dolo”, hoy ny mpanoratra mitanisa izany ary mbola hamafisiny mihitsy aza fa tsy mahay manaja ny tenany: “Mpitety voninkazo, sadasada fiaina” araka ny ambaran’ity tononkalo ity. Tsy izay ihany fa faritan’ny maro ho olona lany atao ny pôeta, miteniteny foana sy manonofy lava eny fotsiny. Arantin’ity sanganasa ity mazava tokoa eto izany fomba fahitan’ny hafa ny pôeta izany: “Mpirediredy
hono"..., "Lazainy ho mpanonofy”... ”Izay hevitrao rehetra, lazainy ho
rediredy”.
Ary tsy vitan’izany ihany fa na ireo soratra voangona amin’ny boky aza dia maivan-danja amin’izy ireo ny tahiry ao anatiny: ”Mpandrafidrafi-boky, ho fandemena saina” hoy i Tsy Avahana mitantara izany. “Pôeta hono adala amin-java-tsisy dikany”. Izay no andalana roa farany hamaranan’i Tsy Avahana ny tapany voalohany amin’ity sanganasany ity sady azo amaritana ny fijerin’ny manodidina ny lanjan’ny pôeta raha atao indray mitopy. Haseho manaraka eto kosa indray ny anjara toeran’ny pôeta eo anivon’ny fiarahamonina. *
Mankahery ny mpamaky amin’izay zava-manjo azy ny pôeta. Tsy ilaozan’ankaso tokoa ny fiainana ary tsy idifian-drahona ny lanitry ny tsirairay. |
Satria
ianao pôeta Dia atafiny aminao Izao karazan-toetra Tsy valahara izao …! Mpirediredy hono Mifiavin-dranotrambo Mifanahinahin-dolo Mpitety voninkazo Lazainy ho mpanonofy Toa sadasada fiaina Mpandrafidrafi-boky Ho fandemena saina Satria ianao pôeta Dia aminy tsy Hendry Izay hevitrao rehetra Lazainy ho rediredy Tsy misy lafitsara Ny valam-pamaritany Pôeta hono adala Amin-java tsisy dikany. Nefa…..! Izao angaha no tsy hainy Na odiany tsy fantarina F’ianao pôeta ilainy Rehefa izy manimanina Moa tsy ny soratrao No mahavita mitanisa Amin’izao tontolo izao Ny hita sy ny tsy hita Tsy ianao pôeta moa No mahita rafi-teny Hampionona ny fo Raha sendra manirery Ianao pôeta hatrany No namany itsikiany Rehefa izy ka tomany Voafitaky ny tiany. TSY AVAHANA |
| Ny
pôeta no manesotra ireny ratram-po aman-tsento mpahazo ny
olona ireny amin’ny alalan’ny sorakantony. Manamafy izany ny hafatra ao
anaty tononkalo hoe: "Ianao pôeta
ilainy, rehefa izy manimanina” sy ny
hoe “Mahita
rafi-teny, hampionona ny fo, raha sendra manirery”. Tsy izay fotsiny ihany ny anjara toeran’ny pôeta voasoratra eto fa mampita hafatra aman-toro lalana ho an’ny mpamaky izy ireny. Ao anaty sorany no mampiseho indrindra ny miafina tsy takatry ny saina sy ny zava-misy tsy noheverina. Abaribarin’ny mpanoratra tokoa izany ka hoy indrindra izy: “Moa tsy ny
soratrao, no mahavita mitanisa amin’izao
tontolo izao.”
Faranan’ny pôeta amin’ny hoe: "Ianao pôeta hatrany, no namany itokiany, Rehefa izy ka tomany, voafitaky ny tiany” ity asasoratra ity eto. Andalana efatra izay mamintina fa tena ilaina tokoa ny pôeta ary manana anjara toerana lehibe eo amin’ny fiainan’ny sarambaben’ny vahoaka. *
* * Eto am-pamaranana dia iaraha-nahita tokoa fa tsy dia nomen’ny olona lanja firy ny pôeta noho izy miavaka amin’ny fananany aingam-panahy hoenti-mamorona. Izay mampiavaka azy izay indrindra anefa no tena rano velona ilain’ny mpamaky amin’ny safotofotom-piainana isan-karazany. Ilaina tokoa ny asasoratra tahaka itony mba hamelona an-tsain’ny maro fa manan-kasina tokoa ny pôeta ary mahasoa ny soratanany. Izao fotoana mampiroborobo ny famokarana zava-kanto izao indrindra koa anefa no ilana fitandremana avy amin’ny pôeta tsirairay mba ho mendrika ny toerany tokoa ny vokatra izay atolony. |
|
©
Pôetawebs
|
Date de dernière mise à jour : 27/07/2020