Mifamatotra - Rakotomavo Gilbert
MIFAMATOTRA
MIFAMATOTRA
RAKOTOMAVO Gilbert
(1938-2000)
Fitia mampifandray!
Fitia mampikambana!,
Fitia mampiraikitra!
Fitia mampifamatotra!
Maro ireo tombontsoa ateraky ny fitiavana eo anivon’ny tontolo anjakan’izany. Ireo endrika isehoan’ny tena fitiavana ao amin’ny kalon-dRakotomavo Gilbert notsongaina tao amin’ny bokiny Safatsiroa no andalanina etoana.
MIKATSAKA
NY SOA IOMBONANA
“Koa mahareta mivavaha
Hitady ho an’ny soa iombonana
Dia mahereza mahatanjaha
Hampandroso ny fiangonana”
Safatsiroa tak 68
Mariky ny fitiavana ny fankaherezana ny hafa mba hirosoany ho amin’ny asa tsaratsara sy mendrika kokoa. Fanentanana ny mpanompon’Andriamanitra mba hijery ny mahasoa ny besinimaro moa no ampitaina ao anatin’ny tononkalo. Asam-piangonana mantsy no ambara; koa izay laharam-pahamehana ho an’ny rehetra araka ny sitrapon’Andriamanitra no tokony ho katsahin’ny Mpitondra fiangonana. Anisan’ny asa mafy indrindra no iantsorohan’izy ireny, koa ilana faharetana sy fiaretana ireo sedra maro izay tsy maintsy lalovana izany. Mampahery ny mpanompon’Andriamanitra àry ny tononkalo amin’ny alalan’ny tenim-pitiavana mba hahefany be amin’ny tsara izay niantsoan’ny Tompo azy. Araka izany, ny fitenenana am-pitiavana no fomba mahomby hampandrosoana ny fiainan’ny hafa.
FIFANAJANA
Fototry ny fahatezan’ny fiarahana
eo amin’ny olon-droa ny fifanajana. Mari-pitiavana feno fatra sy fomba
hikoloana ny fiombonana izany.
“Izao no mba hafatra tiako hitoetra
Ho tena kiady amin’ny atao
rehetra
Mahaiza manaja fitia ao anaty
F’izany no voady natao
mandra-maty”
Safatsiroa tak 69
Zava-dehibe eto ny torolalana ampitaina amin’ny mpiara-belona mba
hampahomby azy eo amin’ny sehatry ny fitiavana. Misarika ny olona
miroso amin’ny fanambadiana ny poeta eto amin’ny tononkalo mba hahay
hifanaja sy hifanome voninahitra eo amin’ny fiombonan’izy ireo.
Manamafy izany ny hoe:
“Ny fitiavana tena fitiavana
Mifanaja ny tia sy ny tiana
Dia ny andaniny roa amin’ny
Havana
Tafatambatra fianakaviana”
Safatsiroa,tak 71
Aseho eto fa ilaina ny fahari-po eo amin’ny fitiavana satria mila
maharitra sy miaritra ny zava-mitranga rehetra eo amin’ny fiainana ny
isambatan’olona. Raha mitoetra amin’izany mantsy ny mpivady dia
milamina ny fo sy ny saina ary afaka mifandray sy mifankahafantatra
tsara.
MIAINA NY
DINA
“Ka ny dina ao anaty
Fa hoe aina no fetra
No hajao tsy ho faty
Fa izay no tarigetra”
Safatsiroa, tak 72
Zava-dehibe ny fanajana ny voady natao teo anatrehan’Andriamanitra ary tsy tokony hotoherina na hidifiana izany, fa tsy maintsy arahina antsakany sy andavany. Ny fifampitokisana mantsy no tena ilaina eo amin’ny fiarahan’olon-droa. Rehefa tafatoetra izany dia maharitra ny fitiavana na dia maro aza ireo fakam-panahy manaloka ny fifankatiavan’izy ireo. Ny tononkalo eto dia maneho fa ilaina ny fifehezan-tena sy fihetseham-po, anisan’izany ny fahatokiana eo amin’ny fiainana mba hahamarin-toerana ny fiombonam-po. Manamafy izany ny hoe:
“Ny fanantenana ‘lay Hasim-panahy
Hambomba hatrany ‘zay enti-miady
No toa bararata noladinim-bahy
Hamatotra feno ny tena mpivady”.
Safatsiroa,tak 70
Tsy vitan’ny herin’ny tena samirery ny fanorenana tokantrano fa mifandrohy mandrakariva amin’ny vavaka arahim-pinoana. Rehefa aorina eo anatrehan’Andriamanitra ny fanambadiana dia azo antoka fa misy ny arofanina izay mifehy ny mpivady. Izany indrindra no mampaharitra ny tokantrano.
Araka ireo voambara ireo dia tsapa fa mampirisika ny mpiara-belona hijoro amin’ny fitiavana marina ny poeta Rakotomavo Gilbert. Maneho mandrakariva ny kalony fa misy hatrany ny maraina sy tara-pahazavana ho an’izay mampanjaka ny fitiavana. Toe-tsaina mendrika tahafina amin’izao vanimpotoanan’ny fisalasalana sy fifampiahiahiana izao izany.
Date de dernière mise à jour : 16/07/2024