'Ndao hianatra fitenim-paritra
'NDAO
HIANATRA FITENIM-PARITRA
Tontosa tao amin'ny
Tranoben'ny Serasera sy ny Kolontsaina AKORY HALY Mahajanga ny
alakamisy 12 jona lasa teo ny hetsika "'Ndao hianatra fitenim-paritra",
hetsika natao hankalazana ny iray volan'ny ny teny malagasy ao
Mahajanga. Ratolojanahary Njara Tiana na Rnt Mpikalo no mpandahateny
tamin'izany. Izy izay fantatra fa pôeta mpikambana ao amin'ny
Havàtsa-UPEM.
Nampiavaka ity hetsika ity ny velakevitra izay niompana tamin'ny
fanasinkasinana ny lanjan'ny fitenim-paritra. Nasongadin'i Rnt Mpikalo
fa antony telo raha kely indrindra no ilana ny fitenim-paritra:
- ampiroboroboana ny fizahantany
- itadiavam-bola amin'ny alalan'ny fampianarana
- ampiasaina rehefa miasa ivelan'ny faritra nonenana taloha
Nisy araka izany ny fanazavana voambolana avy amina fiteny samihafa eto
Madagasikara. Nandravaka ity hetsika ity koa ny seho an-tsehatra
notontosain'ny Vondron'ny Mpiangaly Tantara izay nanehoana ny fiteny
betsileo sy merina ary sakalava. Nahasarika ny dihy mampiavaka ny
isam-paritra nataon'izy ireo mba hanehoana ny harenan'ny kolontsaina
malagasy.
Tsy diso anjara tamin'ity seho ity ny fiantsana tononkalo nataon'ny
mpianatry ny Oniversite sy ny slam niangalian'i Ombre de la plume izay
mpanakanto avy ao an-toerana.
![]() |
![]() |
![]() |
![]() |
![]() |
Date de dernière mise à jour : 15/06/2024