MAMPIARAKA IN-35

Nidorehitra avy hatrany ny sehatra raha vantany vao natolotr'i Kanto Fitahiana ny mpijery ireo mpamelona ny antsa tononkalo sy ny mahakasika ny hetsika. Nanomboka teo dia narevaka avokoa izay hita sy jinery : fitafy jaky mena nomban-doko mainty mivady taminy, nentina nanehoana ny hay fampiarahana ny tena lokon'ny fitiavana. Izany no tamin'ny 3 oran'ny C.G.M. (Cercle Germano Malgache) Analakely tamin'io 24 Febroary io.

Tononkalom-pitiavana ranoiray

Fahaizana miaraka

Noporofoin'ireo Mpiraifaribolana Sandratra ny fahaizana miaraka, fahaizana mampiaraka ary fahaizana misehatra satria nifarimbonan'izy ireo avokoa ny fikarakarana manontolo hatramin'ny pitsopitsony madinika indrindra. Tao ohatra ny mpandrindra hazavana (Tolotra Mampionona Ravonandriana), ny nampiaina tamin'ny mozika lafika (tarika Ny Kanto Fy Iainana) izay mpiraifaribolana Sandratra rahateo no mpitarika azy (Tana Miranty) ary mbola ry zareo koa no nanolotra ny fotoana. Tao ihany koa ny mpaka sary voky traikefa (Mina Ilarion), ny mpikirakira vata marobokotra (Olivier sy Ramahateotia), ny mpandrindra teknika (Olivier sy Mampandriniaina Manitra)... Nanatontosa horonam-peo nampiasaina teny an-tsehatra i Mampandriniaina. Ramahateotia kosa no mpandrindra sehatra ary ireo mpiraifaribolana Sandratra no nandrindra ny hetsika tamin'ny ankapobeny. Izany rehetra izany, miampy an'izay tsy voatonona, no vokatry ny firaisan-kina azo tahafin'ireo fikambanana hafa maniry hanandratra avo ny literatiora malagasy.

Boky "Mampiaraka in-35"