| PÔETAWEBS | "Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto" 17 jona 2020 |
||
 |
Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. Toetra Ràja
|
 |
|
| IRAY
VOLAN'NY TENY MALAGASY — Hetsika Havàtsa-Upem Frantsa — |
|
 |
Herintaona
katroka izay no nanao hetsika lehibe niaraka tamin’ny INALCO na
Institut National des Langues et Civilisations Orientales tao Parisy ny
HAVA?TSA-UPEM, ho fanomezam-boninahitra mpanoratra iray kintan’ny
zavakanto dia i Abel Andriarimalala. Isan-taona tokoa dia manome lanja
ny teny malagasy amin’ny Andron’ny Tenindrazana sy amin’ny Iray
Volan’ny Teny Malagasy ny Fikambanana. Noho ny toe-javatra misy
ara-pahasalamana ankehitriny dia ny fisian’ny valan’aretina
Covid-19, anefa dia tsy misy hetsika azo atao mivantana, saingy tsy
hionona hipetra-potsiny ny mpankafy haisoratra sy ny mpitia
Tenindrazana. |
| NY TANTARANY |
||
 |
Raha
tsiahivina kely ny tantara dia RAHAINGOSON Henri na Di... no namorona
ny Iray Volan’ny Teny Malagasy. Roa Andron’ny Teny Malagasy no
niandohany tamin’ny taona 1993, ny 25 sy 26 jona, ka niitatra ho ny
volana jona manontolo. Olomanga manan-toerana lehibe amin’ny fikajiana
ny teny izy ary Filohan’ny Hava?tsa-UPEM tamin’ny fotoan’androny. Manohy ny hafany araka izany isika mba hiarovana izany teny mamintsika izany, ho eny am-bavan’ny Malagasy hatrany ary hitohy ho velona mandrakariva. |
|
| HETSIKA HAVATSA-UPEM FRANTSA FACEBOOK | ||
 |
Izany
indrindra no mandrisika ny Hava?tsa-Upem Sampana Frantsa hankalaza ny
Iray Volan’ny Teny Malagasy eo amin’ny vondrona Facebook an'ny
fikambanana, efa nanomboka ny lohan’ny volana Jona. Ankoatra ny fizarana aingam-panahy eo dia misy ny “Voambolana tranainy hovelomina” izay manentana ny olona hizara voambolana tsy faheno firy intsony nefa tena mahalaza ny tian-kampitaina, manan-karena mantsy ny teny malagasy. Hangonina anaty boky kely ireny teny ireny ary hanaovana lahatsoratra manokana hiarahana amin’ireo nizara azy. Ho ao amin’ny boky izany ny anaran’ny mpandray anjara ary hahazo loka izay mavitrika indrindra. Takelaboky na “Liseuse” no hatolotra. Mampirisika hamaky ary hampiasa ny voambolana malagasy mba tsy hohadinoina no anton’izany. Mbola mitohy io ka mandeha isan-kerinandro ny litera : - Voalohany : 3 jona - 8 jona ny teny miantomboka amin’ny litera A, B, D, E, F - Faharoa : 8 jona - 15 jona ny G, H, I, J, K - Fahatelo : 16 jona - 22 jona ny L, M, N, O, P - Fahefatra : 23 jona - 30 jona 2020 ny R, S, T, V, Z |
|
| FAHA-60 TAONAN’NY 26 JONA, FAHA-185 TAONAN’NY BAIBOLY MALAGASY VITA PRINTY | ||
| Raha
jerena dia misy rohy lehibe ny daty nofidin’i Di... ho an’ny andron’ny
Teny Malagasy sy ny fankalazana ny niverenan’ny Fahaleovantena. Etsy
an-daniny koa ny toeran’ny famadihana ny Baiboly ho amin’ny teny
malagasy izay nanamarika ny Vanim-potoana Kristianina teo amin’ny
literatiora malagasy an-tsoratra. Koa hankalaza ireo fotoan-dehibe ireo
amin’ny alalan’ny haisoratra isika ny 20 jona 2020 eo amin’ny
tambajotra Facebook, amin’ny 2 ora sy sasany tolakandro ora Frantsa, 3
ora sy sasany tolakandro ora Madagasikara. Ny mpankafy haisoratra dia
asaina avokoa hirotsaka ao amin’ny vondrona, hanoratra eo amin’ny
rindrina misy ny fanasana, handray anjara. Enimpolo minitra hatokana hanaovana ANTSA TOHY VAKANA no hatao, ka samy hivimbina ny lahatsoratra sy ny vetsovetsom-pony ny rehetra. Iray minitra isaky ny mpandray anjara raha 60 isika, ka tongava ny avy amin’ny lafy valon’ny Nosy sy avy amin’ny vazan-tany efatra, hiray feo hiantsa ho an’i Madagasikara sy ny tenin-drazana ! Ny toromarika dia hanao fanamiana miloko ny sainam-pirenena malagasy fotsy mena maitso na hanao fitafy tena malagasy isika rehetra. |
||
 |
||
| Indreto
izahay Havatsa Tonga tsy mivatravatra Fa hanandratra ny teny Sy hilaza ombieny ombieny Fa hafa raha ny teny gasy Rehefa tena tsy misy tasy Tsy mandeha irery anefa Fa miaraka manefa (...) Ramy Laza 12/06/2020 |
Ho
an’ny fandrindrana dia mila mampilaza mialoha ka mariho eo
amin’ny sary ny fahatongavanao handefasana hafatra mialoha ny zoma 19
jona. Izay tonga aloha no raisina mandra-pahafeno. Tononkalo, lahateny, kabary, sombin-dahatsoratra, ohabolana voafidy,... momba ny fitiavan-tanindrazana, ny tenindrazana, ny tolona, ny fiaraha-monina, ny fiainana, ny kolontsaina, ny fitiavana, ny taranaka,... no hantsaintsika. Samy mitondra ny anjarany. Hararaotina ny fisian’ny aterineto sy ny tambajotra mba tsy ho voasaraky ny elanelan-tany isika, na aiza na aiza misy ny tena, rehefa hanandratra ny antsika Malagasy. |
|
| Rohy hahafahana mandray anjara https://www.facebook.com/groups/214601245240606/permalink/3607912405909456 |
||
Tatitra sy sary : Hanitr'Ony
|
©
Pôetawebs
|
Date de dernière mise à jour : 17/06/2020