| PÔETAWEBS | "Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto" 27 jona 2020 |
||
 |
Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.Ràja |
 |
|
 |
Andro
romotra Mpanoratra : Niry-Solosoa Nanadihady : Tsikimilamina Rakotomavo |
|
| Niry-Solosoa |
Tsikimilamina Rakotomavo |
|
Iainan’ny isam-batan’olona manerantany ankehitriny
ny fahasorenana ateraky ny tranga samihafa mampikorontana ny
fiainam-piarahamonina ankapobeny. Miresaka izany fahasarotana izany
indrindra i Niry-Solosoa tao amin’ny tononkalony nampitondrainy ny
lohateny hoe: "Andro romotra" izay nosoratany ny 31 mey 2020 tamin’ny 6
ora maraina. Asongadiny amin’izany fa mihatra amin-koditra ary mila tsy
ho zakan’ny aina ireo olana maro be mianjady amin’ny tsirairay eo
anivon’ny tontolo. Hamahavahana izany akaiky àry dia havohitra ireo
endri-pahasahiranana tsikaritra eo anivon’ny fiarahamonina. Na izany
aza anefa dia ahariharin’ny mpanoratra fa misy ny vahaolana dia ny
fanarahana ireo fepetra tokony horaisin’ny rehetra manoloana
ireny tranga ireny. Ezahina hovoaboasana mifanesy izany. *
Eto am-panombohana àry dia tsara raha
handalanina ireo endri-pahasahiranana tsikaritra eo anivon’ny
fiarahamonina. Hita tokoa amin’izao vanimpotoana izao fa mora
tohina ny ankamaroan’ny olo-miaina. Raha vao misy toe-javatra tsy
mifanaraka na tsy mifanandrify amin’izay heverina fa mari-mahitsy dia
mampisendaotra azy ireny avy hatrany. * * |
ANDRO ROMOTRA Mandro haromotana ny vaninandrontsika Koropaka ny atsy koropaka ny aroa Kororosifahana ny saina ka mivika Koranam-pifaliana tsy tazana intsony Kororokan-dresaka mandrangitra fantsy Koretika ny fo ka manangon-donilony Korapaka ny maro ka mifampihantsy Mandry haromotana ny saina mifanebaka Atsaharo hatreo ny "akorinao izay" Mahaiza mifamela mifona sy mibebaka Ny avonavom-po ange tsy tian’ny Ray Mandrangitra haromontana ny tany fandalovana Izay mitranga eto asidra fitsapana Antomotra ny andro tsy azo ivalozana Ny andron’Izy Tompo ilay andro fitsarana Miandra ny fanahy iraky ny zanaka Hananatra hankahery ny mpino tsy ho lanaka Miandry am-pitoniana ny fo madio ka sambatra Mandry amin-toky tsy korodosin’angatra Niry-Solosoa 31 mey 2020 tamin’ny 6 ora maraina |
|
Ny tsy fitovian-kevitra noho ny firehan-kevitra samy hafa, ny fahalalana tsy mitovy, ny fiheveran-tena ho zavatra no anton’izany. Eo indrindra no ilazan’i Niry-Solosoa amin’ny hoe: "Mandro haromotana
ny vaninandrontsika".
Iainan’ny besinimaro ihany koa ankehitriny ireo olana isan-karazany toy ny fipariahan’ny valanaretina tena mandripaka aina maro, tsy fandriampahalemana; hany ka manjaka ny tebiteby sy ahiahy ny amin’ny fiainana ho avy. Mampivarahontsana avokoa ny fahitana ireo tranga mahonena etsy sy eroa. Manampy trotraka ireo ny tsy fanarahan-dalàna izay ahatarafana fa saro-pehezina sy tsy mankato ny rafitra misy ny olona isam-paritra. Very an-javona irony fahendrena malagasy manaja ny rafitra an-tanan-tohatra sy ireo zoky raiamandreny. Manamafy izany ny mpanoratra amin’ny hoe: "Kororosifahana ny
saina ka mivika"
Mampalahelo aza fa ny olona tokony hifanohana sy hifampahery no lasa mpifahavalo sy mifanaratsy amin’ny alalan’ny fitenenana mandratra izay lasa ozona. Miseho lany ny fanamparam-pahefana, indrindra ireo sakana ataon’ireo milaza ny tenany ho tompon’andraikitra. Miharihary ihany koa ny fanamaivanana ny kolontsaina izay mifototra amin’ny fihavanana. Vokatr’izany dia tsy lavorary ny fifandraisan’ny olona samy olona. Hamarinin’ny Pôeta izany: "Kororokan-dresaka
mandrangitra fantsy
Koretika ny fo ka manangon-donilony" Raha nodinihina teo ireo endrika korontana samihafa hita taratra eo anivon’ny fiarahamonina. Inona kosa ny tokony hatao eo anatrehan’izany? Voalohany indrindra dia ilaina ny fampiorenam-paka ny fiombonana. Mifototra amin’ny fifampihainoana sy fifamelana izany. Koa tsy ho lavorary ny fifandraisana raha tsy miaina anaty fandeferana ny tsirairay eo anatrehan’ny tranga tokony hanapahan-kevitra. Ny sokajin’olona heverina ho mpitarika indrindra no tokony hampiseho fanetren-tena sy finiavana hanao dingana amin’ny fiovam-pijery miabo. Izany no fomba fisainana filamatra hanatsarana ny fifandraisan’ny mpiara-monina. Hoy ny tononkalo: "Mahaiza mifamela
mifona sy mibebaka
Ny avonavom-po ange tsy tian’ny Ray" Manaraka izany dia tokony hotsaroana fa misy ny mpandahatra ny fiainana dia ilay Andriamanitra Ray izay tsy tokony hotsinontsinoavina. Heverina ho toy ny mpanjaka sy mpifehy izy ka afaka manitsy, mitsara izay mety ho fahalemena na lesoka eo amin’ny andavanandro. Koa izany no tsara hanomezana hasina sy hametrahana azy ho amin’ny toerana mendrika mandrakariva. "Antomotra ny andro
tsy azo ivalozana
Ny andron’Izy Tompo ilay andro fitsarana" Ankoatra izay voambara dia zava-dehibe ny fametrahana fitokisana amin’ny hery inoana fa hivimbina fahombiazana tsy ho ela. Ilaina ny fananana fanantenana fa mbola ho avy ny andro izay hiposahan’ny masoandro mibaliaka eo amin’ny isam-baravarana. Samy mibanjina izany avokoa ny olo-drehetra ankehitriny. Manamafy izany i Niry-Solosoa amin’ny hoe: "Miandra ny fanahy
iraky ny zanaka
Hananatra hankahery ny mpino tsy ho lanaka" *
Raha aravona izay rehetra voambara teo
dia tsapa fa miaina anaty savorovoro isan-karazany ny olombelona
rehetra manerantany. Lafim-piainana misandrahaka no isehoan’izany ka
mahavaka ny saina aman’eritreritra izany fikorontanana izany.
Vokatr’izany dia miseho lany ny fifandirana sy fifandrafiana izay
mampisara-bazana ny mpiara-belona. Araka izany dia tokony hamerina ny
lanjan’ny fihavanana ny sokajin’olona rehetra mba hahafahana mametraka
fiarahamonina malagasy tena mendrika. Raha ny tononkalon’i Niry-Solosoa
no asian-teny dia hita tokoa fa kanto noho ny fampiasany tamberim-peo
"k" sy "r" izay mifanahaka amin’ny fomba fiainan’ny olona mijaly sy
mahatsiaro fangirifiriana. Heno ho misy feon-javatra milatsaka sy
mivarina eo am-pandrenesana ny tononkalo izay tsy inona fa ny
fahaverezan’ny soatoavina malagasy. Tsikaritra ihany koa ny
filalaovan’ny mpanoratra ny teny mitovy feo am-panononana saingy samy
hafa fanoratra noho ny fahasamihafan’ny litera tokana manavaka azy ireo
toy ny miandry sy miandra. Koa antenaina ny hitohizan’ny lahatsoratra
tahaka izao mba hisarihana ny sain’ny mpiara-belona hanova fomba fijery
vaovao hanatsaram-piainana amin’ny ho avy. * * |
|
©
poetawebs
|
Date de dernière mise à jour : 27/06/2020
