Faribolana Sandratra eo anivon'ny tantaran'ny literatiora

Nitohy tao amin'ny tranombokim-pirenena Anosy ny alarobia 10 Avrily teo ny fankalazana ny faha-35 taonan'ny Faribolana Sandratra tamin'ny alalan'ny velakevitra nentin'i Dr Ny Hasina Ratsimbazafy (mpampianatra mpikaroka momba ny literatiora sy mpikambana eto anivon'ny Poetawebs). Raha nanana ny tantarany ny literatiora malagasy dia tsy afa-niala tamin'izany ihany koa ny toeran'ny Faribolana Sandratra. Raha fintinina dia azo zaraina telo ny velakevitra : ny fintin'ny tantaran'ny literatiora tany ivelany sy teto an-toerana izay nisy fifandraisany tamin'ny fomba fanoratry ny Faribolana Sandratra ary ireo fomba fanoratry ny Faribolana Sandratra nifanaraka tamin'izay tantaran'ny literatiora izay. Nomarihina teny am-piandohana fa ny tantaran'ny Poezia manokana izay nivoatra nanaraka vanimpotoana isan-karazany no nanorenana ny famakafakana.

Mizara fito izay fomba fanoratry ny Faribolana Sandratra izay.

1) Misy ireo mpanoratra izay mihevitra fa "finoana ny Poezia" ka misy ny andriamanibavy izay manome hosotra ny olona iray ho lasa Poeta. Nantsaina tao ny asasoratry ny Sandratra izay niantso ny "Muses", heverina fa loharanon'ny Poezia tamin'ny andro fahagola tany ivelany.

2) Misy ireo mpanoratra teo anivon'ny Faribolana Sandratra no misy hitovizana tamin'ny fomba fanoratra tamin'ny fotoanan'ny "Pléiade" (nanodidina ny taonjato faha-XVI) ny fomba fanorany. Na eo aza ny rima sy ngadona napetraka harahina sy hahatsara ny Poezia tamin'izany fotoana izany dia tsy natao hamotehana ny vontoatin'ny hevitra na fihetseham-po tian-kampitaina izany. Tao ireo namerina nampiasa ireo teny fahiny efa tsy dia fampiasa intsony (konka, mitambolona, ...). Tao ireo namorona voambolana vaovao hanabeazam-boho ny teny (anjoria, tononkalo-endrika ...). Tao ireo nikaroka fomba filaza mihodinkodina mialoha ny hahatongavana amin'ny tena resaka sns.

3) Tsy afaka tamin'ny asasoratry ny Sandratra ihany koa ny fanarahana izay voalazan'i Randja Zanamihoatra amin'ny maha olona fototra tsy azo sarahina amin'ny tantaran'ny Faribolana Sandratra azy.
    - Ao ireo Poezia teraky ny fo izay nampalaza ireo mpanoratry ny fotoanan'ny Romantisme tany ivelany sy ny vanimpotoanan'ny fiforetana anaty teto an-toerana. Ankoatra ireo asasoratra malahelohelo dia nampiavaka ny Faribolana ihany koa ny resaka Poezia mahatsikaiky.
     - Ao ireo Poezia teraky ny saina sy saro-takarina.

4) Ao ihany koa ireo mpanoratra tsy misaraka amin'ny tantaran'ny fireneny. Hita amin'ireo tononkalom-pitolomana sy milaza ny zava-misy rehetra izay novokarin'ny mpanoratra sasany ao amin'ny Sandratra izany.

5) Ao ireo asasoratra maneho ny "hita ny very" ary mbola manohy ireo hetsika "mitady ny very" tamin'izany:
      - miverina amin'ny loharano nipoirana ka mikalo ireo poezian'ny Ntaolo. Niroborobo araka izany, ny famohazana ireo Poezia fahiny: sôva sy tôkatôka atao an-tononkalo nahatonga ny karazana asasoratra vaovao tôkalo sy sôvaramita.
      - Famoronana karazana Poezia vaovao avy amin'ny fanambarana karazana literatiora samihafa: ny riankalo (tsy miendrika tononkalo ny ankamaroany saingy manan-karena sarinteny, indrindra ny allégorie, manaraka ny onjan'ny hevitra sy ny fihetseham-po). Eo koa ny tsangan-tononkalo sy ny teatra poetika (matetika dia saika lalaovina toy ny tantara tsangana avokoa ny poezian'ny Sandratra ary arahina dihy sy feon-kira ary mpilalao an-tsehatra isan-karazany izany)...

6) Ao ireo asasoratra mitovitovy amin'irony novokarin'ny Parnasse sy Symbolisme irony. Tao koa ireo nanahaka ny surréalisme ka miresaka tontolo hafa, tontolon'ny nofy, tontolon'ny Avelo, ny saro-takarina isan-karazany kanefa tsy voafehin'ny saina mahatsiaron'ny olombelona.

7) Farany dia nomarihina fa misy ihany koa ireo mpanoratra izay manana ny fomba fanorany manokana ary miavaka. Misy izy ireo mamorona zava-baovao ary manana ny filozofiany manokana mihitsy.

Raha fintinina dia ahatarafana ny tantaran'ny literatiora nisy tany ivelany sy teto an-toerana ny fomba fanoratry ny Faribolana Sandratra. Ny mampiavaka azy dia ny fomba famoronany misy fikarohana, tsy mitsaha-mivoatra ary tsy ho voakosoka amin'ny tantaran'ny Poezia, amin'ny tantaran'ny literatiora ankehitriny.

Nisy ny fanontaniana isan-karazany napetraky ny mpanatrika izay samy nahazo ny valiny mahafa-po azy ireo tsirairay avy ary nanao fangatahana manokana ny mpanoratra, filoham-boninahitra, isan'ny tamin'ireo nanangana ny Faribolana Sandratra sady filoha lefitry ny Akademiam-pirenena malagasy, Dr Jean Nalisoa Ravalitera mba hitondrana ity velakevitra ity eny anivon'ny Akademia malagasy.

Poetawebs