Poetawebs tao amin'ny Tsenaben'ny boky 2025

Toetra Ràja - 07/06/2025

Tanteraka soa aman-tsara tao amin'ny tokotanin'ny Tranombokim-pirenena ao Anosy ny 04, 05 ary 06 jona 2025 ny Tsenaben'ny boky izay tafiditra ao anatin'ny Iray Volan'ny Teny Malagasy. Nampiavaka io telo andro io ny fanentanana samihfa toy ny fitantarana angano notontosain'i Arikom's Randria, ny velakevitra nosahanin'i Ranoe amin'ny hoe "Inona no antsoina hoe : mpanoratra sy poeta?", fanolorana ny boky "Lahabôlana betsimisaraka" nosoratan'i Elisé Romuald, ny fanehoana ny bokin'i Anaclet Imbiki "Histoire de l'île de Sainte-Marie de Madagascar", atrikasa samihafa ary indrindra ny fampirantiana tamin'ny Tranoheva izay nampiavaka ireo mpanonta boky (TPFLM, Teny, Le Lauréat...), fivarotam-boky (Md Paoly, Antso...) ary ny mpanoratra toy ny Faribolana Sandratra, Famoloana Telozoro...

Anisan'ny nitazona tranoheva tao ny tranonkala Poetawebs, tsikaritra teo anoloan'ny fidirana ao amin'ny tranombokim-pirenena ary nifanila tamin'ireo seza manatrika ny lampihazo.

Teo anoloan'ny tranohevany ny rantin'ny sorapiainana misy an-dry Dox, J.-J. Rabearivelo, Jean Narivony, Elie Rajaonarison, ny mpitandrina Andrianaivoravelona mianaka. Samy manana ny andian'ny boky Sorapoainana misy azy avy ireo poeta ireo. Teo an-databatra ny santionan'ny boky Sorapiainana miampy ny an'ny poeta sy mpanoratra samihafa. Singanina ao ny "Rakibolan'ny mpianatra" teo ambany fitantanan'ny Pr Narivelo Rajaonarimanana izay mpikamban'ny Poetawebs rahateo. Niavaka tamin'ny andro voalohany ny fitsidihan'ny Ministry ny Serasera sy ny Kolontsaina tao anatin'ny fifaliana ary nanolorana azy ireo andiany anankitelo amin'ny boky Sorapiainana. Terý afara indray ny efijery nandefasana horonam-peo mahakasika ireo andraikitra sahanin'ny Poetawebs.

Zava-dehibe ho an'ny Poetawebs ny fifanakalozan-kevitra tamin'ny mpitsidika izay nahitana mpianatra, mpampianatra, ray aman-dreny, mpanonta boky, olona liana amin'ny literatiora sy ny poezia malagasy. Niantsoroka ny fimasoana ny tranohevan'ny Poetawebs sady tompon'ny sary ampiasaina amin'ity tatitra ity i Tsikimilamina Rakotomavo, Rita, Patrick ary i Hery. Tazana teny an-toerana koa i Solotiana Nirhy-Lanto.

Poetawebs tao amin'ny Tsenaben'ny boky 2025

Minitra fohy mialoha ny fandraisana ny mpitsidika voalohany. Miankavanana : Patrick, Tsikimilamina Rakotomavo, Rita, Hery

Ireo mpitsidika voalohany

Raim-pianakaviana sy ny zanany mandinika fatratra ny raiben'ny poezia malagasy : ny mpitandrina Andrianaivoravelona mianaka

Ny fitsidihan'ny Ministry ny Serasera sy ny Kolontsaina niaraka tamin'ireo mpiara-miasa aminy. Mandray azy ireo :
Tsikimilamina Rakotomavo
(Mpitantana ny Poetawebs)

Fehezam-boky Sorapiainana anankitelo
notolorana ny Ministra

Liana ny mpianatra sy ny ray aman-dreny. Manazava ny momba ny boky Sorapiainana i Rita
I Hery kosa manazava ny atin'ny tranonkala

I Patrick manazava ny momba ireo boky Sorapiainana sy ny bokin'ny poeta hafa

Tsikimilamina Rakotomavo manolotra ny lisitr'ireo poeta 47 efa nanaovana sorapiainana ary voarakita ao amin'ny tranonkala Poetawebs

Solotiana Nirhy-Lanto, mpikamban'ny Poetawebs namadibadika ny bokin'angano nosoratan'i Tsikimilamina Rakotomavo "OMBE"

Eo afovoany i Cathia Razay, mpampianatra taranja Malagasy, mihaino ny fanentanan'ny poeta Hobiana

Miankavanana : Cathia Razay, ny poeta Hobiana, Tsikimilamina Rakotomavo (Poetawebs), ny poeta Felana. Namangy sy nanentana saika ho isan'andro tao amin'ny tranoheva ireo poeta roa namana ireo

Misy amin'ireo nividy boky Sorapiainana no nangataka rakitsiaro. Manatanteraka izany eto ny mpandrindra ny boky Sorapiainana :
Tsikimilamina Rakotomavo

Miandry kely ety ivelany aloha ireo mpianatra liana fa mbola misy olona

Mitataovovonana, misy ny miditra, misy ny mivoaka

Raim-pianakaviana sy mpianatra
manongilan-tsofina amin'ny fanazavana

Hery manolotra ny lisitr'ireo poeta 47 efa nanaovan'ny Poetawebs sorapiainana

Taratra amin'ny endrik'i Fitomiandalana, filohan'ny FMTS, ny fahalinana amin'ny sorapiainana

Ireto anoloana ny boky sorapiainana, hoy i Patrick, ao afara ny bokin'ny poetan'ny ankehitriny. Tsikaritra amin'ny efijery ny Sorapiainana andiany voalohany