 |
PÔETAWEBS | ||
| Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta. T.
Ràja
|
 |
"Tsy
azo adika na alain-tahaka raha tsy mahazo lalana avy amin'ny Pôetawebs
fa voararan'ny lalàna 94-036 ny 18 septambra 1995 mikasika ny zon'ny
mpamorona sy ny mpanakanto". 13 Ôktôbra 2021
|
|
 |
Riankanto Ny Fitiamanolotra nyFISOITRA |
 |
| Riankanto Ny Fitia | Léa Fandresena |
| Fisoitra, hono!
Antsaly anefa aloha. Samy lohatenina boky izany. Hiresaka momba ny
lohateny manaitra sy miavaka amin'ny tononkalo sy boky ny Pôetawebs ato
ho ato. Hisantarana izany ny an'i Riankanto Ny Fitia izay hanazava
amintsika ny tsiambaratelon'ireny lohateny ireny. Mialoha izany, aoka
isika hianoka andalan-teny vitsivitsy nipololotra teo imolony: "Fiangarana
manokana tamin'ny tonom-bintana; notsongaina tamin'ny maro ka fatratra
ny asany, ny lanitra tazano, d'izay mamiratra amin'ny kintana no
fantaro f'hilevenany sy notondroina ho fasany, fa PÔETA manko ireny ary
iraky ny teny..."
|
Léa Fandresena Izany asasoratrao izany, Riankanto Ny Fitia, no hiarahabana ny namana tongasoa mivahiny eto amin'ny Pôetawebs. Iza marina moa i Riankanto Ny Fitia? Riankanto Ny Fitia Faly miarahaba anareo mpikambana rehetra ato amin'ny tranonkala Pôetawebs. RAKOTOMALALA Andoniaina no anarako. Pôeta sy mpanoratra i Riankanto Ny Fitia, solon'anarana entiko misehatra amin'izany, efa namoaka ny boky mitondra ny lohateny hoe Antsaly, tsangambato voalohany izay amboaran-tononkalo. Efa manimanitra any ho any ny boky iarahana amina namana mpanoratra roa, FISOITRA, mbola amboaran-tononkalo ihany koa. Léa Fandresena Efa manangasanga any hoy ianao ny boky iarahana amina namana mpanoratra roa. Midika fa manana fikambanana àry ve ianao? Azonao hazavaina ve aloha ny momba ny boky ANTSALY? Riankanto Ny Fitia Hatreto aloha, mbola tsy anaty fikambanana aho. Antsaly, amboaran-tononkalo hoy aho teo, boky voalohany nosoratako mirakitra sivifolo pejy. Mizara telo mazava tsara ny tara-kevitra hita ao: ny fitiavana, ny embona sy hanina ary ny fasana sy ny fahafatesana. I Hasina Jaonarivony sy Ny Aikoa Razafimanantsoa no nanao ny teny fampidirana.  Léa FandresenaInona indray àry no ifandraisan'ny atiny sy ny lohateny hoe Antsaly? Riankanto Ny Fitia "Antsaly"? Misy heviny roa io teny io araky ny Rakibolana Malagasy. Voaloahany, karazam-borona toa angano ihany ary malaza ho tsara feo aoka izany. Faharoa, feon-kira ritsohina amin'ny valiha; hira mitoreoreo. Mahalaza tsara ny ngadona mamelovelo mandrafitra ireo tononkalo nosoratako io teny io ka nosafidiko ho lohatenin'ny bokiko. Léa Fandresena Ahoana ny fomba hahitana ny boky? Riankanto Ny Fitia Ireo izay liana te hanjifa azy dia afaka manao famandrihana mivantana aty amiko amin'ny alalan'ny fandefasana hafatra miafina amiko ao amin'ny tambajotran-tserasera. Riankanto Ny Fitia no anarako ao. Ny vidiny mirary dia mirary. Léa Fandresena Andeha indray isika hiresaka ny boky faharoa FISOITRA. Miavaka koa ny lohateniny ka azonao hazavaina ve? Riankanto Ny Fitia Boky faharoa. FISOITRA no lohateny entiny. Amboaran-tononkalo ihany koa izy io ary iarahako amina namana mpanoratra hafa, tsy iza izany fa i Antsa Tononkalo.R sy i Vetso Mpamaliha. Ny teny hoe Fisoitra dia nalaina avy tamin’ny anarana hoe “soitra” izay manondro hazo kely fisokirana afo, hisavasavana ny lavenona mba hidiran’ny rivotra ka hampirehitra tsara ny afo. Ny anton’ny safidinay, heverinay telo mirahalahy fa ny fameloma-maso ny Literatiora Malagasy dia toy ny soron’afo. Mila karokaroka izany, mila hetsika avy amintsika mpanoratra koa mba hamiratany tsy ho faty. Léa Fandresena Hahaliana ny maro ny hahafantatra ny atiny! Riankanto Ny Fitia Zato pejy mahery ny boky ary efatra lehibe ny tara-kevitra voizinay ao anatiny: ny fitiavana, ny embona sy tsiahy, ny fiainana sy ny fahafatesana ary ny literatiora. Roa taona niketrehana azy ity izahay telo mirahalahy vao tonga amin’izao. Inoanay fa hahafapo anareo mpanaraka ny vokatra noho izany. Léa Fandresena Hitanay ny petadrindrina mahakasika ny hetsika fanolorana ny boky. Ahoana ny fandehany? Riankanto Ny Fitia Misy hetsika tokoa karakarainay amin’ny famoahana ny boky. Izany dia hotontosaina ao amin’ny Ivokolo Analakely, efitrano teatraly Charles Ravaloson ny 15 Ôktôbra ho avy izao. Ankoatra ny tenako dia hiantsa ny tononkalony ao izy mirahalahy voatonona anarana tetsy ambony dia i Antsa Tononkalo.R sy I Vetso Mpamaliha. Misy andriambavinilanitra telo hanampy anay amin’ny famelomana an-tsehatra ny seho izay nomena endrika teatra. Mizara telo ny sehatra ary eny anelanelan’izany dia horavahana dihy sy hira, ritsoka valiha sy fanentanana maro samihafa. Tsy misy vidim-pidirana io fa hisy kosa, mazava ho azy, ny boky amidy amin’ny sarany 15000 ariary. Manantena ny fahatongavanareo maro izahay. Léa Fandresena Misaotra anao nilaza mombamomba ny boky sy ny seho. Hamaranana ny dinika, ahoana no fahitanao ny tanora sy ny fitiavana boky amin'izao fotoana izao eo anatrehan'ny teknolojia? Riankanto Ny Fitia Variana loatra amin'ny efijery ny ankamaroan'ny tanora amin'izao ka manadino ny boky sy ny soa azo avy amin'izany. Tsy milavo lefona anefa ny mpanoratra fa mikiry hatrany manatevina ireo boky maro efa misy. Iza moa no mahita raha hitsimbadika ny rasa ao aoriana ao ka hifandrotahana indray ny boky? Misaotra anareo nampandroso anay, misaotra ny mpanaraka ihany koa ary mametraka ny mandra-pitafa. Mirary soa tompoko! Léa Fandresena Mankasitraka anao nivahiny dia mirary soa anareo hahavita soa izay atao! |
 |
 |
|
©
Pôetawebs
|
Date de dernière mise à jour : 14/10/2021