AN-DAFY

An-Dafy no lohatenin'ity hetsik'i Raozigasy amin'ny 4 oktobra ao Lisses (91) atsimon'i Parisy ity. Araka izany, miresaka sy mitantara ny fiainan'ny Malagasy aty An-Dafy ny sehatra, mifanaraka indrindra amin'ilay vazivazin'ny ankehitriny hoe "Kifisafosa Party".

Tsy ho irery i Raozigasy eny an-tsehatra fa hotronin'ny mpiangaly zavamaneno, mpihira ary ireo Raozily namany, izany hoe ankizivavy maromaro mifampizara antsa aminy. Raha zohina dia ho voky fahaiza-miangaly tononkalo sy hatsikana noforonin'i Raozigasy ireo mpianoka. Hifanelanelana ao ny kabary, antsa tononkalo sy hira efa diso fantatry ny fiarahamonina. I Kool no mpitendry gitara sady mpihira. Manampy azy i Kiki mpitendry clavier sady mpihira. Mpihira koa i Voara. Raha i Raozigasy sy Kool ary Kiki irery no lehilahy dia ireto kosa ireo Raozily namany : Bakoly, Carol, Felana, Fitia, Lolly, Mi, Miora, Sabrina, Volatiana.

Araka ny   tsiliantsofina voarain'ny Poetawebs dia hizara roa ny fotoana izay samy voarafitra anatin'ny trigrama GVT avokoa.

1. Ireo GVT (Gasy Vao Tonga)
Ato anatin'ity sokajy ity ireo tsy manana taratasy, ireo Gasy voambakan'ny valovotaka, ireo fomba fiaina sy fijery avy tany an-tanindrazana ka mbola raiki-tapisaka sy sakelehina hatrany.

2. Ireo Gasy ValovoTaka
Ato indray no ankafizana ireo manambady vazaha, ireo tsy milamina tokantrano, ireo izay tsy dia mahay miara miaina loatra firy.

Marihina fa tsy hoe tsy misy zavatra tsara akory aty an-Dafy fa ireo noresahina ireo no azo atolotra mba hihomehezana sy isindana kely manoloana ny rotorotom-piainana aty an-Dafy.

Amin'ny 4 oktobra 2025 ao Lisses (91) no fotoana. Ny Poetawebs dia mirary fahombiazana feno ho an'ity hetsika miavaka ity.