Ny pôeta raha miteny dia mampita izay mba reny sady saininy ombieny amin'ny gadona avo lenta mampitony hetaheta : bitsik'ivan'ny pôeta.   T.Ràja 12 janoary 2019

FIAROVANA SANGANASA "Tsy azo adika na alain-tahaka raha tsy mahazo lalana avy amin'ny Pôetawebs fa voararan'ny lalàna 94-036 ny 18 septambra 1995 mikasika ny zon'ny mpamorona sy ny mpanakanto".

FAHATELOPOLO TAONAN'NY FARIBOLANA SANDRATRA - AKADEMIA

"Voavadika ny bainga, ny soratra miainga... Misandratra! Misandratra!"

Vory lanona teny amin'ny lapan'ny Akademia ny mpiraifaribolan'ny Sandratra ny 11 janoary 2019 teo, niaraka tamin'ny fitondram-panjakana sy ireo mpanotrona azy ary ny fianakaviamben'ny haisoratra malagasy. Nosokafana tamin'io andro io mantsy ny fankalazana ny faha-30 taonan'ny fikambanana amin'ny alalan'ny teny faneva hoe "Iainako ny Teniko, hanamasina ny taniko".

MPAMPIAKATRA FANEVA

Tsy very maina akory ny dinitr'izy 9 mianadahy nanangana ny fikambanana ary tsy nikely soroka manandratra ny haisoratra malagasy, hatramin'ny 11 janoary 1989 nanoratana azy ara-panjakana. Efatra amin'izy ireo no efa nampiato ny peniny tsy hikorisa intsony : Elie Rajaonarison (15/11/1951 - 27/11/2010), Solofo José (09/04/1947 - 13/02/2014),  Lydiary (03/02/1947 - 09/09/2012), A.R.Ni (06/12/1961 - 08/08/1993). Mbola miaraka miriaria amintsika kosa ry J. Nalisoa Ravalitera, Ilay, Niry-Solosoa, Ranöe, Rakotonirina Gérard Patrick (Coco), izay tohanan'ireo zandry taty aoriana mampiakatra ny faneva ary mijoro raha nanamarika ny maha-zava-tsarobidy ny fahatrarana an'izao faha-30 taona izao teny amin'ny sehatra avo eny Tsimbazaza.

FANOLORANA MARI-BONINAHITRA Naharitra adin'ny roa ny fotoana; Riambola Mitia no tonian-danonana no nitondra ny teny fiarahabana. Niroso tamin'ny fanolorana mari-boninahitra Ordre des Arts, des Lettres et de la Culture Rtoa JOHASY Eleonore, Minisitry ny Kolontsaina sy Fampiroboroboana ny asa Tanana ary Fiarovana ny Vakoka, ka tao no nahazo Officier ary nisy no nomena Chevalier. Nifandimby nandray fitenenana kosa i J. Nalisoa Ravalitera (Pôetan'ny Faribolana Sandratra), ny Pr Ranjeva Raymond (filohan'ny Akademia) ary Rtoa Ministra JOHASY Eleonore. Hira sy antsa no nialohavan'ny lahatenin'ny Pôeta Ranöe (Rakotomahafaly Norbert Eugène), nanasongadina ny lalana nodiavin'ny Faribolana Sandratra.

VELA-KEVITRA Antsa tononkalom-paritra kosa no niandrasana ny vela-kevitra nentin'ny Dr Rakotomavo Tsikimilamina, mpandalina ny Faribolana Sandratra, mitondra ny lohateny hoe : "Faribolana Sandratra : mamorona fa tsy mamerina, manarina fa tsy mamarina". Nohazavainy tamin'izany ny hevi-tsarobidy fonosin'ny anarana Faribolana Sandratra, ny sary sy ny loko famantarana azy, ny fiainam-pikambanana sy ny fifampitondrana ao anatiny ary indrindra ny lalan-tsarotra niainan'ny fikambanana. Tsy nahasakana an'ireo mpikambany anefa izany kizon-dalana izany fa vao mainka namporisika azy ireo "hamorona fa tsy hamerina". Anisan'ny forona mampiavaka ny Sandratra, hoy ihany ny Dr Rakotomavo Tsikimilamina, ny feon'ny teny tsy voagejan'ny endrika mahazatra, ny filalaovana teny sahy, ny fanehoana hevitra mivantana, ny fitodihan'ny talenta amin'ny fiainam-bahoaka andavanandro sns.

OLONA MANAN-KAJA

Ireto avy ny olona manan-kaja nanatrika ny fotoana : - Ny Minisitry ny Kolontsaina sy Fampiroboroboana ny asa Tanana ary Fiarovana ny Vakoka - Ny Tale Jeneralin'ny Kolontsaina - Ny Talen'ny Foibe misahana ny Kolontsaina - Ny Talem-paritry ny Kolontsaina sy Vakoka Analamanga - Ny Lehiben'ny Sampandraharaha ao amin'ny OFNAC, Foibe misahana ny Kolontsaina, Foibem-paritry ny kolontsaina sy vakoka Analamanga - Ny Filohan'ny Akademia - Ny Filohan'ny sokajy 1 "Haikanto sy Hailaza Akademia" - Mpikambana ao amin'ny Akademia - Filohan'ny FMTS - Fikambanana misahana ny teny sy ny soratra - Mpanorina ny Faribolana Sandratra - Mpikambana Faribolana Sandratra isan-tsampana - Mpianatra maro be - Mpanao gazety samihafa - Fianakavian'ireo nahazo mari-boninahitra
		Miankavanana : ny Talem-paritry ny Kolontsaina sy Vakoka Analamanga  (Rtoa Haingo Rasolondraibe), ny avy ao amin'ny Foibem-paritry ny Kolontsaina Analamanga (Rtoa Fara), ny mpanao vela-kevitra (Dr Tsikimilamina Rakotomavo), ny lehiben'ny sampandraharaha OFNAC (Atoa Rivo), ny mpandrindra Nasionalin'ny Faribolana Sandratra (Atoa Ranöe), ny lehiben'ny Sokajy 1 ao amin'ny Akademia (Rtoa Esther Randriamamonjy), ny Filohan'ny Akademia (Atoa Ranjeva Raymond)

IREO NOTOLORANA MARI-BONINAHITRA

OFFICIER RASOLOHERIMANDIMBY Eloi RAKOTONDRAVELO Hajatiana Rodin RANAIVOHARIJAONA Rado Liantsoa RAVELOARISON Felaniaina RAKOTONDRAZAKA Rado Mbolanirina RAKOTONJANAHARY Meva Mahenintsoa RANDRIANANTOANDRO Sylvia Louidjine RAMAHERISON Rado RAKOTONIAINA Jules Philibert RAKOTOMAVO Tokiharimanitra Tsikimilamina RANDRIANINDRIANA Sandiarivony Zoelson		CHEVALIER RAKOTONARIVO Noa ZAFINDRATIANA Haja Nirimalala RAVONANDRIANA Tolotra Mampionona RAMAROMIANTSO Malalatiana Voahanginirina RAVAKINORO Narilala Ludovic RAMAROSAONA Hantarinivo Faniry HANITRARIVO Riambola Mitia ANDRIAMALALA Riva Ando HERIMANJAKA Tsilavo Manantsoa RAZAKARIVONY Gazela Meva RAKOTOARISOA Hamasy Joé RANDRIANANTOANINA Voahirana RANDRIANAIVO Ridza RAKOTOMAHAFALY Fenitrarivony Njiva RAKOTOARISON Todisoa Nantenaina Fidimalala
Fianakaviamben'ny Faribolana Sandratra		Ireo Andriambavilanitry ny Faribolana Sandratra sy ny sakaizan'ny Faribolana Sandratra

Tatitra : Toetra Ràja
Sary : Tsiky Rakotomavo

poetawebs@gmail.com

a