Maro tokoa ny hevitra miafitra ao amin'ny ny tononkalo araka ny nambaran'ny mpanao velakevitra. Hoy indrindra izy "Anisan'ny mpanabe an-kolaka ny mpamaky ny mpanoratra". Tsy tambo isaina ireo ambadika avohitran'ny soratry ny Faribolana Sandratra tahaka ity ambaran'i Ranoe ity:
"Raha lehilahy ialahy
Ho velona ambony
Ho velona ambany
Fa maty an-tenantenany".
Tsikaritra ny hevitra mifanohitra miendrika tantara ambadika. Ohatra amin'izany ny tononkalon'i Rija Al-Jonah:
Aviavia Raorana
Mamiko Ilay kotsa
Satrinao Ilay lena
Re amin'ny fiantsana tononkalo ny teny mitovy fanonona, sahalahala gadona ary heverina ho toy ny feo mananihany. Hoy indrindra i Tahirintsoa:
Ity kininina ity
Ve hahavita hanafana
An'ity ririnina ity?
Ankoatra ireo dia misy ny teny miverimberina sy ny rima tapaka miteraka sary ao an-tsain'ny tsirairay izay mamaky sy mihaino.
Zotram-pandalinana nihataka tamin'ny fijery mahazatra no naroson'i Ramahatehotia tamin'ny famelabelarana satria nanokatra ireo tsiambaratelo tany an-tsain'ny isam-batan'olona ny tononkalon'ny Faribolana sandratra. Nidina ifotony tany am-parahatoky ny mpamaky ireo nambaran'ny poeta. Nametraka adihevitra hosainin'ny mpandinika moa i Mahefa ka nanolotra lohahevitra azo trandrahina toy ny hoe: "Kifonofono miboraka ao anaty vazo miteny". Anisan'ny fehezantenin'i Mahefa nanaitra teo am-pamaranana ny tafany ny hoe: "Misy firaisan-tsoratra miteraka nofy".
Antony nahatonga ny safidiny amin'izao lohahevitra izao ny fahatsapany fa adidy ny mamaofy izay miafina ao amin'ny tononkalo ary indrindra andraikitra ny manadihady tononkalo. Tsikaritra tamin'ny famelabelarana fa anisan'ny fetran' ny fikarohana nataony ny fanehoana ireo ohatra avy amin'ny tononkalon'ny Faribolana Sandratra izay miresaka matetika ny taovam-pananahana sy izay tsiambarantelo manodidina izany. Tsy tontosa ny karok'i Mahefa raha tsy teo ireo tahiry samihafa nanovozany ny loharanon-kevitra toy ny Baiboly, poeta hafa, boky sy tahirin-kevitra samihafa, tononkalo Faribolana Sandratra.
Tiana ny manamarika fa nahaliana ny maro ny velakevitra ka nahatonga ireo fanontanian'ireo mpanatrika maro samihafa. Nameno ny efitrano malalaky ny Akademia ireo mpikamban'ny Akademia, mpitondra Fivavahana, mpianatra eny amin'ny anjerimanontolo, mpiraifaribolana.
Tatitra: Tsikimilamina Rakotomavo
MAHEFA : NAMPIHARIHARY NY TAKONA
