Zavakanto
enti-maneho hevitra sy fihetseham-po amin’ny alalan’ny teny voarindra
ny tononkalo. Amin’ny teny tsotra nefa manan-danja no anehoan’ny poeta
ny fomba fijeriny ny fiainana. Anisan’ireo miresaka an’izany ity
andininy voalohany amin'ny “Ny Tsikitsikinao” tononkalon’i Dox, nalaina
tao amin'ny boky Folihala tak 61, manasongadina fa manan-danja amin'ny
fifandraisan'ny olombelona ny tsiky.
Angamba
tsikitsiky ho azy nalefanao tsy iniana…
Tsy takatrao ny halehibeny, tsy
nampoizinao ny asany…
Voninkazo iny anefa,
voninkazom-pifaliana…
Nisy tia nioty azy, ny
tsikitsikinao dia lasany !
Raha eo amin’ny fiainana andavanandro, mifantoka amin’ny fihetsika
tsotra izay mety hiteraka vokatra lalina ity tononkalo ity. Ny
tsikitsiky, izay heverina ho fihetsika madinika sy tsy misy lanjany
firy, no ampiasain’ny mpanoratra hanehoana fa mety hisy fiantraikany
lehibe eo amin’ny hafa ny zavatra atao tsy am-piheverana.
Ao amin’ny andalana voalohany sy faharoa dia asehon’ny poeta ny tsy
fahatsapan’ilay nandefa tsikitsiky ny vokatra aterany. "Angamba tsikitsiky
ho azy nalefanao tsy iniana…" Tsy nampoiziny akory fa
nisy olona nandray izany ho zava-manan-danja. "Tsy
takatrao ny halehibeny, tsy nampoizinao ny asany…" Hita
mazava eto ny fahasamy hafana misy eo amin’ny fikasana sy ny vokatra
ateraky ny fihetsika iray.
Manaraka izany, fanoharana lehibe tsy azo odian-tsy hita ny fampitahana
ny tsikitsiky amin’ny voninkazo. Mariky ny hatsarana sy ny fifaliana ny
voninkazo, ka amin’ny alalan’izany no anehoan'ny mpanoratra fa mitondra
haravoana sy fahazavana ho an’ny hafa ny tsikitsiky, na dia tsy
tsapan’ilay nandefa aza ny hasarobidiny. Hoy indrindra i Dox manamafy
izany eo amin’ny an-dalana fahatelo hoe : "Voninkazo iny
anefa, voninkazom-pifaliana…"
Farany, ny filazana fa "nisy tia nioty”
ilay tsikitsiky dia manambara fa noraisina sy notahirizina tao am-po
izany. Tsy nandalo fotsiny ilay fihetsika, fa lasa loharanom-pifaliana
ho an’izay nandray azy. Hamafisina eto fa mety hiteraka fifandraisana
ara-pihetseham-po lalina ny fahatsorana sy ny hatsaram-panahy.
Araka izany, mampianatra ity tononkalo ity fa tsy tokony hatao tsinontsinona ny tsiky izay zava-madiniky ny andavanandro kanefa manome fifaliana, fitoniana, fiadanam-po ho an'ny manodidina. Mety hanova toe-po sy hitondra fanantenana ho an’ny hafa ny tsikitsiky tsotra. Koa manentana ny tsirairay ny mpanoratra mba hizara hatsaram-panahy amin’ny manodidina azy, satria mety ho lasa zava-dehibe ho an’ny hafa ny fihetsika kely ataontsika.
