Hotantaraiko ve?
Pôetawebs PÔETAWEBS
Ny pôeta raha miteny
dia mampita izay mba reny
sady saininy ombieny
amin'ny gadona avo lenta
mampitony hetaheta :
bitsik'ivan'ny pôeta.
T. Ràja
Pôetawebs "Tsy azo adika na alain-tahaka raha tsy mahazo lalana avy amin'ny Pôetawebs fa voararan'ny lalàna 94-036 ny 18 septambra 1995 mikasika ny zon'ny mpamorona sy ny mpanakanto".
25 Aogositra 2022
Lahatsoratra : Faniry Ezeckiel
HOTANTARAIKO VE?

Nanakoako indray ny literatiora noventesina teto an-drenivohitra ny sabotsy 20 Aogositra 2022 teo. Nampianoka tsangan-tononkalo ho an'ny mpankafy ireo pôeta efatra mirahalahy, Aingan'ny Ala, R.H. Toky, Indrafo Tsihoarana ary Ela Nihetezana. Tao amin'ny Cité Rose R+3 Ankatso II no toerana nanatanterahana izany.

"HOTANTARAIKO VE ?" no lohateny finidin'ireo mpiangaly soratra nentina nambaboana ireo mpijery. Nikarakara sy nanomana ity hetsika ity ny AJES (Association des Jeunes Étudiants de la Sakay na Fikambanan'ny mpianatra avy any Ankadinondry Sakay). Tanjon'izy ireo ny handrisika ireo mpanan-talenta amin'ny fanoratana mba hiditra anaty fikambanana, hahafahany mampivoatra ny famoronany.

Amin'ny ankapobeny, afa-po ireo nanatrika na dia nisy olana kely aza teo amin'ny lafiny fanamafisam-peo. Tiana ny manamarika fa vahiny nasaina manokana i Riva (sary ankavia), pôeta efa manana ny toerany eo amin'ny literatiora malagasy.

Tsapa ho miroborobo hatrany ny tontolon'ny zava-kanto eto amintsika ary maro ireo tanora mpandimby ny anaran-dray mirona ao amin'ny tontolon'ny haisoratra.



Ireo pôeta efatra mirahalahy miaraka amin'ireo mpanakanto mpanohana

Pôeta miatrika ny fianohan'ny mpakafy antsa tononkalo

© Pôetawebs
Takelaka : Toetra Ràja

Date de dernière mise à jour : 25/08/2022